چیرۆکی ئەو ژنەی هەموو داهاتی کارەکەی دەبەخشێت

هەواڵ / ڕاپۆرت :: 16/06/2019‌ :: 1852‌ جار بینراوە

تاگ :: ڕاپۆرت

دواڕۆژ، ئازوو محەمەد

چەند خولێك چاوەكانتان دابخەن و جیهانێك بێنە بەرچاوتان كە مرۆڤەكانی تەنیا بیر لە ئاشتی و ئارامی و میهرەبانی دەكەنەوە و بۆیان گرنگ نییە دەبێت بۆ گەشتن بەو مەبەستە چەند ناخۆشی و سەختی قبوڵ بكەن.


مریەم موحێبی، ئەو خانمە گەنجەیە كە لە ساڵی 1984 لە شاری بەندەر عەباس لە ئێران لەدایكبووە و  بڕوانامەی ماستەری لە شێوەكاری دا هەیە و نزیكی دوو ساڵە بووتە رووەكخۆر.

مریەم لە ئێستادا لە شاری تاران دەژی و لە چێشتخانەكەیدا خواردنگەیەكی بچووكی ئۆنلاینی تایبەت بە رووەك خۆرەكان دروستكردووەو یاسا و رێسای تایبەتی خۆی بۆ داناوە.

ئەو خانمە رۆژانە تەنیا 10 مشتەری قبوڵ دەكات و داهاتی رێستۆرانتەكەی بۆ دروستكردنی خواردن بۆ منداڵانی كار و منداڵانی بێدایك و باوك و هەژار تەرخان دەكات.

مریەم موحێبی لە لێدوانێكدا بۆ ئاژانسی ئیسنای ئێرانی دەڵێت: "هەموو كات حەزمكردووە كارێكم ببێت كە پر بێت لە وزە و لە رێیەوە بتوانم ببمەهۆی خۆشحاڵی كەسانی دیكە و تێكەڵیم لەگەڵ مرۆڤەكان و كۆمەڵگە زیادتر بێت و كەسانی زیاتر بناسم".

موحێبی لە درێژەدا دەڵێت: "من نزیكی دوو ساڵە بوومە رووەكخۆر و ریستۆرانتەكەشم تایبەتە بەو كەسانەی خواردنی سرۆشتی و رووەك دەخۆن".

ئەوەی كە من رووم كردە رووەك خۆری و ئەو ریستۆرانتەم كردەوە، هۆكارێكی خەمناكی لە پشتەوەدایە كە دەگەرێتە بۆ زیاتر لە دوو ساڵ لەمەوبەر كە برایەكی 35 ساڵانم بە هۆی نەخۆشی شیرپەنجەوە كۆچی دوایی كرد.

پێش ئەوەی براكەم كۆچ بكات، لە لێكۆڵینەوەكاندا بۆم دەركەوتبووە، باشترین چارەسەر، چارەسەری سروشتی و رووەكەكانە و من لەو ماوەدا بە باشی ئاشنای ئەو بوارە ببووم.

من پاش كۆچی دوایی براكەم تووشی خەمۆكی بووم و نەمدەتوانی بە هیچ جۆرێک ئەو رووداوە قبوڵ بكەم و شێوەكاریشم وەلا خستبووە، بۆیە بە پێشنیاری هاورێیەكەم ئەم كارەم بە مەبەستی هاوكاری منداڵانی كار و بێ سەرپرست و هەژار دەستپێكرد.

من كارەكەم بە حەز و ئاواتێكی زورەوە دەستپێكرد و بۆ ئەوی كە ئەو كارەم رێ لە بەرپرسیاریەتییەكانم لە ژیانی هاوبەش و گەورەكردنی منداڵەكەم نەگرێت، رۆژانە تەنیا دە مشتەری قبوڵ دەكەم و مشتەرییەكانم وەكو میوانی ماڵەكەم سەیر دەکەم و بۆ خواردنەكانم  تازەترین و سروشتیترین كەرەستە بە كاردەهێنم و  دوایی داهاتی  رێستۆرانتەكەم بۆ خواردنی تەندروست بۆ منداڵەكانی كار(ئەو منداڵانەی لە شەقامەكان یان شوێنەكانی دیكە كار دەكەن یان بێ دایك و باوكن) تەرخان دەكەم.

مریەم لە درێژەدا دەڵێت:  هاوسەركەم لەم ماوەدا باشترین پاڵپشتم بووە، ئەو خواردنەكان بۆ منداڵەكان دەبات  و زۆر كاتیش خواردنە داواكراوەكانی مشتەریەكانیشم ئەو دەیبات.
 من تەنانەت یەك تمەن لە داهاتەكەم بۆ خۆم خەرج ناكەم، ئەو شتەی بۆ من گرنگە، پێكەنین و خۆشحاڵی مشتەریەكان و دڵخۆشكردنی منداڵان و  هاندان و راكێشانیان بۆلای ژیانێكی تەندروستە.

ئەو خانمە شێوەكارە دەشڵیت: من لە ئێستادا لە باری دەروونییەوە زۆر ئاسوودەم و پێموایە متمانە و بڕوا گەورەترین سامانە بۆ مرۆڤ و ئەگەر من بە رەفتار و كارەكەم، كاریگەریم تەنانەت لەسەر یەك كەسیش بووبێت، بۆم جێی دڵخۆشییە.

 

پ: ئەڤین

بڵاوکردنەوە: ئیحسانی مەلا فوئاد



created by Avesta Group and powered by Microsoft Azure