دەست بەسەر 630 كیلۆ ماسی ڕاوكراودا دەگیرێت

هەواڵ / کوردستان :: 16/06/2019‌ :: 590‌ جار بینراوە

دواڕۆژ، عەلی حەمە سەعید

نیوەڕۆی ئەمڕۆ یەكشەممە 16ی حوزەیرانی 2019 لە كۆنگرەیەكی ڕۆژنامەوانیدا وتەبێژی بەڕێوەبەرایەتی پۆلیسی دارستان و ژینگەی هەڵەبجە ئامارەكانی ماوەی قەدەغەكردنی ڕاوەماسی خستەڕوو.

بەگوێرەی ئەو ئامارانەی بڵاوكراونەتەوە، لەماوەی سێ‌ مانگدا 630 كیلۆ ماسی دەستیبەسەردا گیراوە كە بەبڕی زیاتر لە یەك ملیۆن دینار فرۆشراون.

فەرمان عومەر، وتەبێژی بەڕێوەبەرایەتی پۆلیسی دارستان و ژینگەی هەڵەبجە لە كۆنگرە ڕۆژنامەوانییەكەدا ئاماژەی بەوەكرد، لە ماوەی سێ‌ مانگی قەدەغەكردنی ڕاوەماسی لە سنوری پارێزگای هەڵەبجە 47 تۆمەتبار دەستگیر كراون كە بەشێوەی نایاسایی هەستاون بە ڕاوكردنی ماسی، لەكاتێكدا لەساڵی ڕابوردوودا تەنها 37 تۆمەتبار لەو ماوەیەدا دەستگیركرابوون، هاوكات هەر لەمساڵدا دەستیشگیراوە بەسەر 312 تۆڕی ماسیدا لەكاتێكدا ساڵی ڕابوردوو 350 تۆڕ دەستیان بەسەرد گیرابوو.

ئەوەشی خستەڕوو، هەر لەماوەی سێ‌ مانگی ڕابوردوودا هێزەكانیان توانیویانە دەستبگرن بەسەر 50 ماسی گەورەدا كە كێشان بریتبووە لە 630 كیلۆ كە بەشێوەیەكی نایاسایی ڕاوكراون، دواتر بە فەرمانی دادوەر بە زیادكردنی ئاشكرا بە بڕی یەك ملیۆن و 545 هەزار دینار فرۆشراونەتەوە، هەر لەمساڵدا 11 كەوی ڕاوكراو دەستیان بەسەردا گیراوە 17 چەكی جۆراوجۆریش دەستیان بەسەردا گیراوە.

وتەبێژەكەی بەڕێوەبەرایەتی پۆلیسی دارستان و ژینگەی هەڵەبجە ئەوەشی وت: "ئەوەی لای ئێمە تۆمار كراوە لە حاڵەتەكانی ئاگركەوتنەوە لەمساڵدا تا ئێستا 10 حاڵەتی ئاگركەوتنەوەن كە بەهۆیانەوە بەسەدان دۆنم لە پوش و پاوان و دارستانی سروشتی ناوچەكە سووتاون، بەڵام هیچ كەسێك بەهۆی ئەو ئاگرانەوە دەستگیر نەكراون".
پێداچوونەوە: ئارام غەفور 



created by Avesta Group and powered by Microsoft Azure