وێنە: کچێک دوای پێنج ساڵ لە رفاندنی دۆزرایەوە

هەواڵ / کوردستان :: 16/06/2019‌ :: 12203‌ جار بینراوە

دواڕۆژ، رەڤەند گوھەرزی

دوای پێنج ساڵ لە رفاندنی، کچێکی ئێزدی لەباشوری قەزای شنگال (شەوی رابوردوو 15ی حوزەیرانی 2019) لەکەمپی ھۆڵی چەکدارانی داعش دۆزرایەوە و گەیەندرایە ماڵی ئێزدییان لە ھەرێمی جزیرە.


فەیسەڵ عەلی، چالاکی ئێزدی بە دواڕۆژی راگەیاند: "شەوی شەممە کۆمیتەی رزگارکردنی رفێندراوانی ئێزدی لەماڵی ئێزدییەکان لەھەرێمی جزیرە لە رۆژئاوای کوردستان توانییان کچێک لە کەمپی ھۆڵی چەکدارانی داعش بدۆزنەوە كە كوردە و ئێزدییە". 

وتیشی: "ئەو کچە ئێزدییە ناوی (سەراب نایف عیسا)ی تەمەن 18 ساڵە کە لە 3ی ئابی 2014 لە گوندی گرعوزێر لە باشوری قەزای شەنگال لەلایەن چەکدارانی داعش رفێندرابوو".

ئاماژەی بەوەشکرد: ئێستا پێنج کچی رزگارکراوی ئێزدی لە دەستی داعش لەماڵی ئێزدییەکانن لە ھەرێمی جزیرە لە رۆژئاوای کوردستان و چاوەڕێدەکرێت ھەفتەی داھاتوو بگەنە شەنگال".

لەسەرەتای ھێرشی چەکدارانی داعش بۆ سەر قەزای شەنگال لە ساڵی 2014 ھەزار و 293 کەس گیانیان لەدەستداوە و شەش ھەزار و 417 کەس رفێندراون و 68 مەزاری ئێزدییەکان تەقێندراونەتەوە و زیاتر لە  سێ ھەزار و 371 کەس لە دەستی داعش رزگارکراون.


پێداچوونەوە: ئارام غەفور



created by Avesta Group and powered by Microsoft Azure