هێزه‌كا پێشمه‌رگه‌یان سه‌ربازگه‌هه‌كا تركیا د پارێزیت

هەواڵ / کوردستان :: 13/06/2019‌ :: 174‌ جار بینراوە

دواڕۆژ، دهۆك

هێزه‌كا پێشمه‌رگه‌یان یا سه‌ر ب وه‌زاره‌تا پێشمه‌رگه‌ یا حكومه‌تا هه‌رێما كوردستانێ ل قه‌زا زاخۆ یا دهۆك، سه‌ربازگه‌هه‌كا له‌شكه‌رێن تركیا د پارێزیت.

ژێده‌ره‌كى ل ناحییا باتووفا یا زاخۆ بۆ دواڕۆژ گۆت: "هێزه‌كا پێشمه‌رگه‌یان‌ یا فه‌وجا 2 سه‌ر ب لیوا 4 یا وه‌زاره‌تا پێشمه‌رگه‌ كو نێزیكى 60 پێشمه‌رگه‌یانه‌ ل گوندێ گرێبی، ده‌مێ 5 رۆژانه،‌ سه‌ربازگه‌ها له‌شكه‌رێن تركیا ل وى گوندى د پارێزن".

ڤى ژێده‌رى كو نه‌ڤیا ناڤێ وى بهێت خوه‌یاكرن بۆ دواڕۆژ دازانین: "ئه‌و هێزا پێشمه‌رگه‌یان ل قۆتابخانا گوندێ گرێبى هاتیه‌ بنه‌جهكرن، 24 ده‌مژمێران زێره‌ڤانیێ  ل سه‌ربازگه‌ها تركیا دكه‌ن".

ده‌رباره‌ى ئه‌گه‌رێ چۆنا وێ هێزا پێشمه‌رگه‌یان دڤى ده‌میدا بۆ گوندێ گرێبى زه‌لالكر: "ئێڤا رۆژا 7-ێ ڤێ مه‌هێ، گه‌ریلایێن پارتیا كاركه‌رێن كوردستان(په‌كه‌كه‌) هێرش كرنه‌ سه‌ر سه‌ربازگه‌ها له‌شكه‌رێن تركیا ل گرێبى، له‌ورا هه‌ر وێ ئێڤارێ ئه‌و هێزا پێشمه‌رگه‌یان‌ بۆ پاراستنا سه‌ربازگه‌ها گرێبى گه‌هشتنه‌ گوندێ گرێبى".

سه‌ربازگه‌ها گرێبى یا له‌شكه‌رێ تركیا ل سنوورێ پارێزگه‌ها دهۆك مه‌زنترین سه‌ربازگه‌هه‌، لدووڤ زانیاریێن دواڕۆژ، ئه‌ڤ ساله،‌ تركیا نێزیكى 50 له‌شكه‌رێن خوه‌ ل وێ سه‌ربازگه‌هێ زێده‌كرینه‌، دوو ساله‌ لدووڤ ئێك، گه‌ریلایێن پارتیا كاركه‌رێن كوردستان(په‌كه‌كه‌) هێرش دكه‌نه‌ سه‌ر وێ سه‌ربازگه‌هێ.

پ: چ.ع

بڵاوکردنەوە: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure