ل شاریا 128 دەلیڤێن کاری بۆ ئاوارەیێن شنگالێ هاتنە دابینکرن

هەواڵ / کوردستان :: 13/06/2019‌ :: 119‌ جار بینراوە

دوارۆژ، رەڤەند گوهەرزی

ژبۆ پێشکێشکرنا هاریکاریێن دارایی بۆ ئاوارێن شنگالێ و ئاکنجیێن شاریا یێن کێم دەرامەت، بنگەهێ لالش تایێ شاریا ب پاڵپشتیا رێکخراوا JDA یا نیڤ دەولەتی، رابوون ب دابینکرنا 128 دەلیڤێن کاری بۆ هەردوو رەگەزێن نێر و مێ.


دلگەش سەلیم، رێڤەبەرێ بنگەهێ لالش یێ رەوشەنبیری و کومەڵایەتی تایێ شاریا بۆ دواڕۆژ راگەهاند: "بنگەهێ لالش تایێ شاریا ب پاڵپشتیا رێکخراوا JDA یا نیڤ دەولەتی، رابوون ب دابینکرنا 128 دەلیڤێن کاری بۆ هەردوو رەگەزێن نێر و مێ یێن ئاوارێن شنگالێ و ئاکنجیێن شاریا".

گۆتژی: "پشتی کارکرنێ بۆ ماوێ 20 رۆژان، هەر کرێکارەکی کۆژمێ 400 دولاران بەرامبەر کار و خزمەتا خۆ وەرگرتن کو سەرجەمێ گشتی یێ پارەی دبیتە بتری 51 هزار دۆلارێن ئەمریکی".

رێڤەبەرێ بنگەهێ لالش یێ رەوشەنبیری و کومەڵایەتی تایێ شاریا گۆت: "کارێ وان پێکهاتبوو ژ کارێ پاقژکرنا ئەردێن چاندنێ و جادە و کۆلانێن شاریا و نوژەنکرن و پاقژکرنا هەژمارەکا قوتابخانێن شاریا و هەردوو هۆلێن لالش ئێک و دوو یێن خێر و شەرا".

دلگەش دیارکر ژی: "ئەڤ پرۆژە دێ بەردەوام بیت بۆ هندێ هەژمارەکا مەزنا خێزانێن هەژار و دەست کورت مفادار ببن و هەر کەسەکی تنێ جارەکێ ماف هەیە ناڤێ خۆ تۆمار بکەت بۆ هندێ کو مەزنترین هەژمارا گەنجان مفاداربن".

پ: چ.ع



created by Avesta Group and powered by Microsoft Azure