ئەو تۆمه‌تباره‌ى لەسەر رووداوێكى هاتووچۆ کەسێکی کوشت دەستگیرکرا

هەواڵ / کوردستان :: 12/06/2019‌ :: 916‌ جار بینراوە

دواڕۆژ، هانا چۆمانی 

بەڕێوەبەری پۆلیسی ھەولێر رایده‌گه‌یه‌نێت: ئەو كەسەی دوێنێ بەهۆی رووداوێکی بچوکی هاتووچۆ شوفێرێكی كوشت دەستگیركراوە و ده‌شڵێت: زیانى رووداوەکە تەنیا 500 دۆلار بووە.

عەبدولخالق تەڵعەت، بەڕێوەبەری گشتی پۆلیسی ھەولێر (ئەمڕۆ چوارشەممە 12ى حوزیرانی 2019) لە كۆنگرەیەكی رۆژنامەوانیدا رایگەیاند: دوای ئەوەی دوێنێ لەكاتی رووداوێكی ھاتووچۆدا لە ھەولێر شوفێرێك بەناوی (محەمەد عەبدولعەزیز) بەهۆی رووداوێکی هاتووچۆ بە دەمانچە تەقەی لە شوفێرێكی دیكە كرد بەناوی (ھیشام ئیسماعیل)، خۆی رادەستی پۆلیس كرد و دانی بە تاوانەکەیدا ناوە.

وتیشی: "بەداخەوە زیانی هەردوو ئۆتۆمبێلەکە تەنیا 500 دۆلار بووە، به‌ڵام کەسێک کوژرا کە نەدەبوو ئەوە رووبدات".

دوێنی له‌ فولكه‌ی بازی سه‌ر رێگه‌ی موسڵی شاری هه‌ولێر، رووداوێكی پێكدادان لەنێوان دوو ئۆتۆمبێل روویدا و دواتر یەكێك لە شوفێرەكان بە دەمانچە تەقەی لە شۆفێره‌كه‌ى تر کرد و کوشتی.

هەر لە کۆنگرە رۆژنامەوانیەکەدا بەڕێوەبەری پۆلیسی ھەولێر هێمای بۆ ئەوەکرد: چەند تۆمەتبارێكی دیكە دەستگیركراون، کە وەک ئاسایش و پۆلیس خۆیان ناساندووە و پارەیان لە خەڵک وه‌رگرتووه‌ و رێگریان کردوە، دەستیش بەسەر چەند پارچە چەك و ژمارەی ساختەی ئۆتۆمبێلدا گیراوە و پەڕاوی لێكۆڵینەوە بۆ تۆمەتباران كراوەتەوە.

روونیشیكردەوە: "چەند تاوانێك ئەنجامدراوە بەو ئۆتۆمبێلانەی ژمارەی ساختەیان ھەبووە كە لێكۆڵینەوەمان دەكرد ئۆتۆمبێلەكان ئەولیاتیان نەبوو، دواتر بۆمان دەركەوت كە ژمارەی ساختەیان بۆ ئۆتۆمبێلەكان دروستكردووە".

پێداچونه‌وه‌: شیروان شه‌ریف

 بڵاوكردنه‌وه‌ :هـ.ق



created by Avesta Group and powered by Microsoft Azure