بەنرخترین شوێنەوار لە سلێمانی دەدۆزرێتەوە

هەواڵ / که‌لتور :: 11/06/2019‌ :: 320‌ جار بینراوە

دواڕۆژ، راپۆرتى سامان قوبادی


دەیان بەردی بە نرخ كە مێژوویان دەگەڕێتەوە بۆ سەردەمی ساسانییەكان دۆزراونەتەوە و لە مۆزەخانەی سلێمانی نمایش كراون. پڕۆژەی دۆزینەوەی بەردەكان لەلایەن تیمێكی شوێنەوارناسی ناوخۆیی بەهاوبەشی لەگەڵ پسپۆڕانی شوێنەواری ئیتاڵی ئەنجامدراوە.


هاشم حەمە عەبدوڵـڵا بەڕێوەبەری مۆزەخانەی سلێمانی، بۆ دواڕۆژ وتی: "بەهاوبەشی لەگەڵ تیمێكی زانكۆی ساپێنزای رۆمانی لەگەڵ تیمی شوێنەواری سلێمانی و گەرمیان، لە شوێنەواری پەیكوڵی لە قەرەداغ، كە 100 كیلۆمەتر لە سلێمانییەوە دوورە، كاری كنە و پشكنین كراوە بۆ دۆزینەوەی بەرد و دروستكردنەوەی نەخشەیەكی تۆپۆگرافی گرنگ بۆ شوێنەكە. بۆ ئەو مەبەستەیش گەلەرییەك لە مۆزەخانەی سلێمانی تەرخانكراوە كە 113 بەردی لەخۆگرتووە، تێچووەكەی لەسەر زانكۆی ساپێنزای رۆمایە لە ئیتاڵیا، ئەوان جارێكی تر خوێندنەوە و توێژینەوە و پاككردنەوەیان بۆ ئەم بەردانە كردووە".

 لەبارەی مێژوو و مانای نووسینی سەر بەردەكان، بەڕێوەبەری مۆزەخانەی سلێمانی دەڵێت: "ئەو نووسینانەی لەسەر بەردەكانە، تۆماركردنی یادەوەریی پاشایەكی ساسانییەكانە بە ناوی (نەرسی) كە وەك شانازییەك پیاوماقوڵان پێشوازییان لێكردووە، بەهۆی ئەوەی ئەم پیاوە دەسەڵاتی لە برازازاكەی خۆی وەرگرتووتەوە و تاجی پاشایەتی لەسەر كردووە".

هاشم هەروەها وتی: "ئەم بەردانە زۆر گرنگن چونكە زانیاریی زۆر لەسەر مێژووی ناوچەكە و ناوی كەسایەتییەكان و پۆستەكانیانی لەسەرە، مێژووەكەیان دەگەڕێتەوە بۆ سەردەمی ساسانییەكان كە دەكاتە 200 بۆ 300 ساڵ پێش زایین. بەهۆی بارودۆخی كەشوهەوا هەروەها بۆ ئەوەی نەشكێنرێن و لەناونەچن، بەپێویستمانزانی لە مۆزەخانەی سلێمانی دابنرێن  و هۆڵێكی تایبەتمان بۆ تەرخانكردووە".

بەڕێوەبەری مۆزەخانەی سلێمانی وتیشی: "پڕۆسەی دۆزینەوە و پاككردنەوەی بەرد و ئاسەوارەكان لەو ناوچەیەدا بەردەوامە".



  • ڕۆژ
  • هەفتە
  • مانگ
created by Avesta Group and powered by Microsoft Azure