دهۆك: كارگه‌هه‌كا میرى سالانه‌ 50 هزار تێشكێن ماسییان به‌رهه‌م دئینیت

هەواڵ / ئابوری :: 11/06/2019‌ :: 297‌ جار بینراوە

دواڕۆژ، بورهان یه‌حیا
به‌رپرسێ به‌شێ ماسییان ل رێڤه‌به‌رییا سامانێن ئاژه‌لى ل پارێزگه‌ها دهۆك راگه‌هاند؛ ب رێیا كارگه‌هه‌كا تایبه‌تمه‌ند ل سه‌ر رووبارێ دیجله‌ى سالانه‌ 50 هزار تێشكێن ماسیێن به‌رهه‌م دئینین.

 
شوكرى عومه‌ر مسته‌فا به‌رپرسێ پشكا ماسییان ل رێڤه‌به‌رییا به‌رهه‌مێن ئاژه‌لى (ئه‌ڤرۆ سێشه‌مب 11 حۆزه‌یران 2019) بۆ دواڕۆژ رۆهنكر" پێشتر ئه‌ڤ جۆرێ كارگه‌هێن میرى یا به‌رهه‌مئینانا تێشكێن ماسییان ب تنێ ل هه‌ولێر و سلیمانیێ هه‌بوو، لێ پشتى نه‌رازیبوونا مه‌ و داخوازا ڤه‌كرنا وێ ل دهۆك هاته‌ په‌سه‌ندكرن و هه‌تا نوكه‌ به‌رده‌وامه‌ ل سه‌ر كارێ خۆ و ب شیانێن ناڤخۆ و بودجه‌یا تایبه‌ت یا رێڤه‌به‌ریێ سالانه‌ دشێین بۆ سنۆرێ پارێزگه‌هێ 50 هزار تێشكێن ماسییان به‌رهه‌م بینین و ل سه‌ر خودانێن پڕۆژه‌یان دهێنه‌ به‌لاڤكرن".

دیاركر" ب رێیا ڤێ كارگه‌ها تایبه‌تمه‌ند ماسیێن دایك دهێنه‌ كرین و پشتى خودانكرنێ هێكان دكه‌ن و ئه‌و هێك د ئامیرێن تایبه‌ت دا دهێنه‌ هه‌لگرتن و پشتى دبنه‌ تێشك و كێشا وان دگه‌هیته‌ 1 گرام ل سه‌ر خودانێن پڕۆژه‌یێن ماسییان یێن كو مۆله‌تا فه‌رمى هه‌یه‌ ب بهایێ 25 دینار بۆ هه‌ر تێشكه‌كێ دهێنه‌ به‌لاڤكرن".

خویاكر" هه‌تا نوكه‌ 4 جاران ئه‌ڤ قه‌باره‌یێ تێشكێن ماسییان ل سه‌ر خودانێن پڕۆژه‌یان هاتینه‌ به‌لاڤكرن و ب گۆره‌ى دووماهى ئامار ل سنۆرێ پارێزگه‌ها دهۆك 66 پڕۆژه‌یێن مۆله‌ت دایى یێن ژ جۆرێ (قه‌فه‌س، حه‌زێێن ئاخێ و سه‌له‌مون) هه‌نه‌ و ب به‌رده‌وامى پشته‌ڤانییا وان دهێته‌كرن".

شوكرى عومه‌ر ئاماژه‌كر" ل سالا بۆرى ل هه‌رێمێ كارگه‌ها به‌رهه‌مئینانا ماسییان ل دهۆك ل رێزا ئێكێ  هاتبوو چونكو شیا بوو نێزیكى 60 هزار تێشكێن ماسییان به‌رهه‌م بینیت و ل پارێزگه‌هێن دى ژبه‌ر كاریگه‌رییا قه‌یرانێ نه‌شیابوون چ قه‌باره‌یه‌كێ به‌رهه‌م بینن".   

 پێداچوونه‌وه‌ :هـ.ق

بڵاوکردنەوە: چ.ع



created by Avesta Group and powered by Microsoft Azure