بۆ نووژه‌نكرنا فرۆكخانه‌ مووسل 20 ملیار دینار هاتینه‌ ته‌رخانكرن

هەواڵ / ئابوری :: 08/06/2019‌ :: 117‌ جار بینراوە

تاگ :: عێراق

دواڕۆژ، بورهان یه‌حیا

سه‌رۆكاتییا جڤاتا پارێزگه‌ها نه‌ینه‌وا بڕیار دایه‌ ژ بودجه‌یا ئه‌ڤ ساله‌ كۆژمه‌یێ 20 ملیار دینار بۆ دووباره‌ نووژه‌نكرنا فرۆكخانه‌یا مووسل ته‌رخان بكه‌ت.


سه‌یدو حسین ئه‌ندامێ جڤاتا پارێزگه‌ها نه‌ینه‌وا (ئه‌ڤرۆ پێنجشه‌مب 6 حۆزه‌یران 2019) بۆ دواڕۆژ رۆهنكر" ل ده‌مێ كه‌ڤتنا مووسل ل 2014ێ و دووباره‌ رزگاركرنا وێ ل سالا 2017ێ زیانێن مه‌زن ب فرۆكخانه‌یێ كه‌ڤتینه‌ و جادده‌یا وێ یا سه‌ره‌كى ژناڤ چۆیه‌ و دگه‌ل به‌شه‌كێ مه‌زن ژ ئاڤاهیێن وێ یێن كارگێرى زیانێن مه‌زن گه‌هشتینه‌ و بۆ دوباره‌ نووژه‌نكرنا وێ بڕیار هاتییه‌دان ژ بودجه‌یا ئه‌ڤ ساله‌ كۆژمه‌یه‌كێ پاره‌ى بۆ بهێته‌ ته‌رخانكرن".

سه‌یدۆ چه‌تۆ سه‌رۆكێ جڤاتا پارێزگه‌ها نه‌ینه‌وا د راگه‌هاندنه‌كێ دا بۆ مالپه‌رێ فه‌رمیێ جڤاتێ راگه‌هاندییه‌" ب پترییا ده‌نگان جڤاتێ بڕیار دایه‌ كۆژمه‌یێ 20 ملیار دینار ژ بودجه‌یا  جڤاتێ یا سالا 2018-2019 بۆ نووژه‌نكرنا فرۆكخانه‌یا مووسل بهێته‌ ته‌رخانكرن و ل ده‌ستپێكێ دێ هه‌موو ئه‌و زێده‌گاڤیێن سه‌ر هاتینه‌كرن هێنه‌ لادان و پاقژكرن".

راگه‌هاند" هه‌موو رێڤه‌به‌ریێن په‌یوه‌ندیدار ل مووسل دگه‌ل هه‌ر دوو كۆمپانیێن (ئه‌لفاو و سه‌عدیێ ئه‌ندازیارى) دێ د ڤى كارى دا به‌شداربن و دووباره‌ ده‌ست ب كاربوونا ڤێ فرۆكخانه‌یێ دێ په‌یوه‌ندییا پارێزگه‌ها مووسل دگه‌ل پارێزگه‌هێن دى بهێز ئێخیت و كه‌رتێ گه‌شتوگوزار و دیسا ئابوورێ پارێزگه‌هێ ژى پێشئێخیت".

فرۆكخانه‌یا مووسل یا نێڤده‌وله‌تى ل سالا 1920ێ هاتییه‌ ئاڤاكرن و ل سالا 1922 كه‌رتێ سڤیل ژى ل سه‌ر كه‌رتێ له‌شكه‌رى ل فرۆكخانه‌یێ هاتییه‌ زێده‌كرن  و پشتى سالا 2003ێ ئه‌مریكا ئیراق داگیر كرى ئه‌و فرۆكخانه‌ بۆ مه‌ره‌مێن له‌شكه‌ر  بكارهاتبوو و ل سالا 2008ێ دووباره‌ بۆ كارێن سڤیل راده‌ستى حوكمه‌تا ئیراقێ هاتبووكرن و ل سالا 2014ێ ژى كه‌ڤته‌ ده‌ستێ چه‌كدارێن داعش و ل 2017ێ دووباره‌ هاته‌ رزگاركرن و هه‌تا نوكه‌ نه‌هاتییه‌ نووژه‌نكرن و ڤه‌كرن.
 بڵاوكردنه‌وه‌ :هـ.ق



  • ڕۆژ
  • هەفتە
  • مانگ
created by Avesta Group and powered by Microsoft Azure