هۆكاری ئاگرەكەی عەلوەی شارەزوور ئاشكرا بوو

هەواڵ / کوردستان :: پێش 3 هەفتە ‌ :: 1319‌ جار بینراوە

دواڕۆژ، عەلی حەمە سەعید


بەهۆی شۆرتی كارەباوە درەنگانی شەوی رابردوو بازاڕی میوەفرۆشانی شارەزوور لەقەزاكە ئاگری گرت و ژمارەیەك دوكان سووتان، زیانی گیانیش نەبووە.


دوای ئەوەی درەنگانێكی شەوی ڕابردوو ئاگرێكی بەهێز لە عەلوەی بازاڕی سیروانییەكانی قەزای شارەزوور كەوتەوە، ئەمڕۆ چوارشەممە 5/6/2019 قایمقامیەتی قەزای شارەزوور ڕوونكردنەوەیەكی لەسەر كەوتنەوەی ئەو ئاگرە بڵاوكردەوە.
 
لە ڕوونكردنەوەیەكدا كە وێنەیەكی بۆ دواڕۆژ نێردراوە، ئاماژە بەوەكراوە لە درەنگانێكی شەوی ڕابردوو ئاگرێك لە شوێنی میوە فرۆشانی بازاڕی سیروانییەكان لە قەزای شارەزوور كەوتەوە كە بەهۆیەوە چەندین دوكان بە تەواوی سووتان و زیانێكی مادی زۆریش بە بەر بازاڕەكە كەوت، بەڵام بە هەماهەنگی لەگەڵ بنكەكانی ئاگركوژێنەوەی شارەزوور و ناحیەی وارماوا توانیمان ئاگرەكە كۆنتڕۆڵبكرێت و زیانی گیانی لێنەكەوێتەوە.
 
ئاماژە بەوەشكراوە، لەلێكۆڵینەوە سەرەتاییەكاندا ئەوە دەردەكەوێت كە پێدەچێت ئاگرەكە بەهۆی شۆرتی كارەباوە كەوتبێتەوە، بەڵام سەرقاڵی لێكۆڵینەوەی وردن بۆ دەستنیشانكردنی هۆكاری ئاگركەوتنەوەكە و خەمڵاندنی زەرەر و زیانەكانی ئاگرەكە.
 
بازاڕی میوەفرۆشان كە بە عەلوەكە ناسراوە، دەكەوێتە بازاڕی سیروانییەكانی قەزای شارەزوور و جێگای بژێوی دەیان هاوڵاتی و خێزانی قەزای شارەزوورە.

پێداچوونەوە و بڵاوكردنەوە: ئارام غەفور 



  • ڕۆژ
  • هەفتە
  • مانگ
created by Avesta Group and powered by Microsoft Azure