ڕاگرتنی هاوردەکردنی ئۆتۆمبێلی لێدراو و لافاو نرخەکەی بەرزکردووەتەوە

هەواڵ / ڕاپۆرت :: پێش 4 هەفتە ‌ :: 2249‌ جار بینراوە

دواڕۆژ، سەنگین خۆشناو

بەهۆی قەدەغەکردنی هاوردەکردنی ئۆتۆمبێلی لێدراو و لافاو، بازرگانان ڕێژەیەکی زیاتری ئەو جۆرە ئۆتۆمبێلانە هاوردە دەکەن، بازرگانانی کوردستان و ئیمارات چاویان لەوەیە حکومەت بڕیارەکە درێژ بکاتەوەـ بڕیارەكە زیانی لەبازاڕەكانی ئیماراتیش داوە.

 

کۆمپانیاکانی گواستنەوەی ئۆتۆمبێل لە ئیمارات چیتر ئەو ئۆتۆمبێلانە هەناردەی هەرێمی کوردستان ناکەن

حاجی عەبدوڵا كە بازرگانی ئۆتۆمبێلە لە ئیمارات بۆ دواڕۆژ دەڵێت: "ئێمەش بەو بڕیارەی حکومەتی هەرێمی کوردستان زەرەرمەند دەبین، چونکە تائێستا زیاتر لە 200 ئۆتۆمبێلم لە ئەمریکا کڕیوە تا کۆتایی مانگی شەش ناگاتە ئیمارات".

 

دەشڵێت: "دوای ئەو بڕیارە تاوەکو ئێستا نرخی هەر ئۆتۆمبێلێکی لێدراو و نوقمبوو، 1500 بۆ 2000 دۆلار دابەزیوە، هەموو بازرگانێکی کورد ناوێرن بیکڕن، بەڵام لەم مانگە بەراورد بە مانگەکانی پێش ئەم بڕیارە فرۆشی ئێمە لەسەدا 40% زیادیکردووە، بەشێک لە بازرگانان لە دەستپێکی بڕیارەکە ڕێژەیەکی زۆری ئەو ئۆتۆمبیلانەیان کڕیوە".

 

لە مانگی 7دا فرۆشی ئۆتۆمبێل لە دوبەی لەسەدا 40% کەمدەبێتەوە

بازرگانانی کورد بەشێکی دیار و سەرەکی کڕیاری ئۆتۆمێلن لە ئیمارات، هێرش عەلی کاکۆ، بازرگانێکی کوردە و ماوەی 15 ڕۆژە لە دوبەی ماوەتەوە بۆ ناردنی دواین کاروانی ئۆتۆمبێلەکانی، ئەو بازرگانە بە دواڕۆژی راگەیاند: "ئەگەر ئەو بڕیارە درێژ نەکرێتەوە، 40% زیان بە بازاڕی ئۆتۆمبێل دەگات لە دوبەی".

 

هێرش عەلی، ڕاشیگەیاند: "هەر کاتێک خواست لەسەر شتێک زۆر بێ و ئەو شتەش لەبازاڕ کەمبێت، نرخی بەرزدەبێتەوە، بەڵام ڕاستییەک هەیە ئەویش ئەوەیە بەشێکی بازرگانان ڕێژەیەکی زۆریان لەو ئۆتۆمێلانە کڕیوە بۆ ئەوەی دوای بڕیارەکە قازانجێکی زیاتر بکەن".

 

وەزارەتی ناوخۆ بەمەبەستی برەودان بە گواستنەوەی ئەو ئۆتۆمبێلانەی کە بازرگانان کڕیویانە و هێشتا هاوردەیان نەکردووە، جێبەجێكردنی بڕیاری قەدەغەکردنەکەی خستە مانگی 7، بەڵام هێشتا بازرگانان چاویان لە درێژکردنەوەی ماوەکەیە تا مانگێکی دیکە.

 

سامی جەلال، بەڕێوەبەری گشتی دیوانی وەزارەتی ناوخۆ بە دواڕۆژی ڕاگەیاند: ئەو دەنگۆیانەی باس لە درێژکردنەوەی ماوەی هاوردەکردنی ئۆتۆمبێلی لێدراو و نوقمبوو دەکەن ڕاست نین، ڕاشیگەیاند: "ئێمە دەمانتوانی بڕیارەکە زووتر جێبەجێبکەین، بەڵام ڕەچاوی ئەوە کرا کە زۆرێک لە بازرگانان کە ئۆتۆمبێلیان کڕیوە دەرفەتیان هەبێت تا هاوردەی دەکەن بۆ کوردستان، بەڵام دوای ئەو بەروارەی کە دیاریکراوە کە 1ی تەمموزی 2019یە یە بەهیچ شێوەیەک ماوەی بڕیارەکە درێژ ناکرێتەوە".

 

85%ـی ئۆتۆمبێلەکان دەستی دوون و لە ئەمریکا و ئیمارات هاوردە دەکرێن

بەپێی ئامارەکانی وەزارەتی بازرگانی و پیشەسازی، لە شەش مانگی یەکەمی ساڵی 2017دا 43 هەزار و 575 ئۆتۆمبێل هاوردەکراون، ساڵی ڕابوردوو 62 هەزار و 250 ئۆتۆمبێل هاوردەکراون، واتا بە بەراورد بە شەش مانگی یەکەمی ساڵی 2017، هاوردەکردنی ئۆتۆمبێل بەڕێژەی 30% زیادیکردوە.

 

هەر بەپێی داتاکان، لە پێنج ساڵی رابوردوو، 451 هەزار و 337 ئۆتۆمبێل هاوردەی هەرێمی کوردستان کراون، ساڵی رابوردووش نزیکەی 131 هەزار ئۆتۆمبێل هاوردەکراون، لە چوار مانگی ئەمساڵدا 68 هەزار ئۆتۆمبێل هاوردەکراون. 

پێداچوونەوە: ئارام غەفور

بڵاوکردنەوە: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure