جیهان بە کورتی: پێویستە ئەمریکا جەنگى کەنداوى سێیەم هەڵنەگیرسێنێت

هەواڵ / جیهان :: 20/05/2019‌ :: 1509‌ جار بینراوە

تاگ :: جیهان

دواڕۆژ

 

ئەلجەزیرە- ڤیدیۆیەک دەسڕێتەوە باس لەوە دەکات هۆلۆکۆست زۆر جیاوازە لەوەی جولەکەکان گێڕاویانەتەوە

گرتە ڤیدیۆییەک لەسەر پەیجی ئەلجەزیرە بیلعەرەبی لەسەر تۆڕە کۆمەڵایەتیەکان بڵاوبووەوە و دەیوت جولەکەکان ڕاستی و ئامارەکانی هۆڵۆکۆستیان شێواندوە تاوەکو ئەڵمانیا قەرەبوویان بکاتەوە و دروستکردنی ئیسڕائیل لەسەر ئایدۆلۆژیای نازییەکان بووە، ئەم ڤیدیۆیە لە ماوەیەکی کەمدا 1.1 ملیۆن بینەری هەبووە و پەیجی جەزیرە ناچاربووە بیسڕێتەوە.

 

 

سپوتنیک- ترامپ لەناوەڕاستی بارگرژییەکەی لەگەڵ ئێران دەڵێت: تەنیا گرنگی بە "داگیرکارییە"بازرگانییەکان دەدات

لە چاوپێکەوتنێکدا لەگەڵ کەناڵی فۆکس نیوز، دۆناڵد ترامپی سەرۆکی ئەمریکا ئاشکرایکرد: تاکە بوار کە دەیەوێت داگیری بکات بازرگانییە و لەئەنجامدا ترسی پێکدادانی نێوان ئەمریکا و ئێران کەمدەبێتەوە.

 

 

ئینجنیرین- خۆرە دەستکردەکەی چین لەتوانایدایە وزەیەکی پاکی بێسنور بەرهەمبهێنێت

سەنتەری تاقیکردنەوەکانی تۆکاماک بووە یەکەم شوێنی سەر زەوی کە بزوێنەرەکەیان بگاتە 100 ملیۆن پلەی سیلیزی (شەش هێندەی کرۆکی خۆر گەرمترە) و هەنگاوێکی گەورەیە بۆ بەدەستهێنانی وزەی پاک لە جیهاندا.

 

 

فرانس24- لە فڕەنسا و جیهاندا هەزاران کەس بەبۆنەی ڕێپێوانی ساڵانە دژی مۆنسانتۆ کۆبوونەوە

هەزاران خۆپیشاندەر لە فڕەنسا و 30 دەوڵەتی دیکەی جیهانەوە دژی چالاکییەکانی کۆمپانیای زەبەلاحی بایر مۆناسانتۆ تایبەت بە بەرهەمهێنانی مادە کیمیاییە کشتوکاڵییەکان خۆپیشاندانیان کرد، ئەمەش لە کاتێکدایە کۆمپانیای مۆنسانتۆ سێیەم سکاڵای دادگایی لە ئەمریکادا دۆڕاند.


 

ئیندپێندەنت- لە شاری بیلیم لە باکوری بڕازیل 11 کەس بە دەستڕێژی گولـلە مردن

نیوەڕۆی رۆژی یەکشەممە حەوت چەکداری دەمامکدار دەستڕێژی گولـلەیان کردە سەر باڕێک لە شاری بیلیم لە باکوری بڕازیل و بەهۆیەوە پێنج ژن و شەش پیاو گیانیان لەدەستدا.

 

 

ئیندپێندەنت-لە ماوەی پێنج ساڵی پێشوودا بەکارهێنانی کۆکاین لە بڕیتانیا بووەتە دوو هێندە

پاش ئەنجامدانی پشکنین بۆ ئاوی زێرابەکان دەرکەوت لەماوەی پێنج ساڵدا بەکارهێنانی کۆکاین گەیشتووەتە دوو هێندە، هەروەها هەردوو شاری لەندەن و بریستۆڵ لە سەرەوەی لیستی ئەو شارانەی ئەورووپایە کە ئەم ماددە هۆشبەرە بەکاردەهێنن، لەکۆتایدا سەرژمێرییەکە ئاماژەی بەوەدا کە 50%ی خەڵکی لەندەن رۆژانە مادەی هۆشبەر بەکاردەهێنن.

 

زە ڤێرج- گوگڵ مۆڵەتی ئەندرۆید لە هواوی دەسەنێتەوە

لە چوارچێوەی هەڵمەتە ئەمریکییەکەی سەر کۆمپانیا تەکنەلۆجییەکانی چین، گوگڵ مۆڵەتی بەکارهێنانی سیستمی ئەندرۆیدی لە هواوی سەندەوە، چونکە وەزارەتی بازرگانی ئەمریکا هواوی کردە لیستی ئەو کۆمپانیایانەی نابێت بەبێ مۆڵەتی حکومەت تەکنەلۆجیا لە کۆمپانیا ئەمریکییەکان بکڕێت. 

 

 

نیویۆرک تایمز- سەرۆکی نەمسا داوا دەکات مانگی ئەیلول هەڵبژاردن ئەنجامبدرێت

رۆژی شەممە سەرۆکی نەمسا داوای ئەنجامدانی هەڵبژاردنێکی نوێی کرد لە مانگی ئەیلودا، ئەمەش پاش بڵاوبوونەوەی گرتە ڤیدیۆی راوێژکارێکی ڕاستڕەوی توندڕەو کە تیایدا بەڵێن بە ژنێک دەدات کارەکانی بۆ جێبەجێ بکات و گومانی ئەوە دەکرێت ژنەکە وەبەرهێنەرێکی رووسی بێت. 


 

نیویۆرک تایمز- کارمەندەکانی بانکی دۆیچە چالاکییەکی گومانلێکراویان لە هەژماری بانکی ترەمپ و کۆشنەر بینی

ساڵی 2016 بۆ 2017 چەند پسپۆڕێکی بواری شتنەوەی پارە لە بانکی دۆیچە دەستەی چاودێریکردنی تاوانە داراییە فیدڕاڵییەکانیان لەوە ئاگادارکردەوەی کە چالاکی گومانلێکراو لە چەند هەژمارێکی بانکی دۆناڵد ترامپ و کۆشنەردا بینراوە.


 

رەئی ئەلیەوم- کۆمپانیایەکى نەرویجى: ئێران ئاسانکارى کردوە لە جێبەجێکردنى ئەو هێرشەى کرابوە سەر 2 کەشتییە سعودیەکە

کۆمپانیایەکى دڵنیایی نەرویجى ئاشکرایدەکات کە سوپاى پاسدارانى ئێران ئاسانکارى کردوە بۆ جێبەجێکردنى ئەو هێرشەى رۆژى یەکشەممە 12ى ئایارى کرابووە سەر دوو کەشتى گوێزەرەوەى نەوتى سعودى لە نزیک کەناراوەکانى فوجەیرە لە ئیمارات و هێرشەکەش لە رێگەى موشەکێکى ژێردەریایی ئاڕاستەى ئەو دوو کەشتییە کرابوون. 


رەئی ئەلیەوم- حوسییەکان 299 بنکەى سەربازى سعودى و ئیماراتى و حکومەتی یەمەنیش دەکەنە ئامانج

گروپى ئەنساروڵاى حوسییەکان رۆژی یەکشەممە هەڕەشەى لەوە کرد کە 299 دامەزراوەى سەربازیی لە هەر یەک لە سعودیە و ئیمارات و یەمەن دەکاتە ئامانج و دەیانپێکێت، سەرچاوەیەکى لە وەزارەتى بەرگرى حوسییەکان بۆ ئاژانسى سەبا دوا و وتى: "ئۆپراسیۆنى 9ى رەمەزان سەرەتایەکە بۆ دەستپێکردنى کردەوە سەربازییەکانمان دژى پێکانى 300 ئامانجى سەربازى سەر بەو وڵاتانەى دژمان هاوپەیمانییان بەستووە". 

 

ناشناڵ ئینترێست: پێویستە ئەمریکا جەنگى کەنداوى سێیەم هەڵنەگیرسێنێت

گۆڤارى (ناشناڵ ئینترێست) ى ئەمریکى نوسیویەتى: "نابێت ویلایەتە یەکگرتووەکانى ئەمریکا بکەوێتە هەڵەى هەڵگیرسانى جەنگى کەنداوى سێیەم، چونکە راستە کە ئێران هەڕەشەیە بۆ سەر ئەمریکا، بەڵام بیانووى بەرپاکردنى جەنگێک دژى ئەو وڵاتە لاوازە و هیچ بنەمایەکى نییە و پێویستە لەسەر ئەمریکا سەرەتا گرنگى بە هەڕەشەکانى ئەو 3 وڵاتەى دیکە بدات وەک چین و کۆریاى باکور و روسیا. 

 

ئێن بی سی- ترامپ بیانووەکانى ئامادە کردوە بۆ ئەوەى بیسەلمێنێت کە ئێران هەڕەشەیە بۆ سەر وڵاتەکەى

بەپێی سایتى ئێن بى سى ئەمریکى ئیدارەى دۆناڵد ترامپ، سەرۆکى ئەمریکا بیانووەکانى ئامادە کردوە بۆ ئەوەى بیسەلمێنێت کە ئێران هەڕەشەیە بۆ سەر وڵاتەکەى و بەرپاکردنى جەنگیش لەدژى نزیکە، بەڵام بەپێی وتەکانى لێپرسراوە ئەمریکییەکان، واشنتۆن هەوڵدەدات بۆ کەمکردنەوەى ئەو گرژییانەى دژى ئێران دروستیکردوە لە ناوچەکە و وەزیرى دەرەوەى ئێرانیش وتویەتى کە ئێران نایەوێت دژى ئەمریکا جەنگ بەرپا بکات.
 
تایم- سه‌رۆكه‌ نوێیه‌كه‌ی ئۆكرانیا په‌رله‌مان هه‌ڵده‌وه‌شێنێته‌وه‌

ڤۆڵۆدیمیر زیلینسكی، ئه‌ستێره‌ی كۆمیدی ئۆكرانیا، كه‌ ئه‌مڕۆ پاش سوێندخواردنى بووه‌ سه‌رۆك وڵات، ده‌وترێت به‌هۆیه‌وه‌ چه‌رخێكی نوێ ده‌ستپێده‌كات له‌و وڵاته‌ی كه‌ بۆ چه‌ندین ساڵ به‌هۆی جه‌نگ و قه‌یرانی داراییه‌وه‌ وێران بووه‌، یه‌كه‌م كاری سه‌رۆكه‌ نوێیه‌ ته‌مه‌ن 41 ساڵه‌كه‌ هه‌ڵوه‌شاندنه‌وه‌ی په‌رله‌مانه‌ وه‌ك خۆی ده‌ڵێت كه‌ ئه‌ندامه‌كانى هیچ گرنگییه‌ك به‌ به‌ره‌وپێشچوونی وڵاته‌كه‌ ناده‌ن و ته‌نها بیر له‌وه‌ ده‌كه‌نه‌وه‌ چۆن خۆیان ده‌وڵه‌مه‌ندن بن و پاره‌ی وڵاته‌كه‌ بخۆن.

 

ئیندیپێنده‌نت – ده‌یان هه‌زار ژنى كۆریاى باكور له‌ چین بازرگانى سێكسییان پێوه‌كراوه‌ و به‌شێوازێكى سیستماتیكى ده‌ستدرێژییان كراوه‌ته‌سه‌ر

 به‌پێ هه‌واڵێكى سایتى ئیندیپێنده‌نتى بریتانى ده‌یان هه‌زار ژن و كچى كۆریاى باكور له‌لایه‌ن ڕێكخراوه‌كانى تاوان و به‌قاچاخبردنه‌وه‌ براون بۆ چین و بازرگانییان پێوه‌كراوه‌ و له‌لایه‌ن پیاوانه‌وه‌ ده‌ستدرێژییان كراوه‌ته‌سه‌ر تا ئه‌وكاته‌ى جه‌سته‌یان به‌كه‌ڵك نه‌ماوه‌.

 


وەرگێڕان: هێڤی فەرهاد و ئاکۆ زەنگەنە

بڵاوکردنەوە: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure