له‌ رووداوێكى هاتوچۆدا چه‌ندین كه‌س بوونه‌ قوربانى

هەواڵ / کوردستانی :: 19/05/2019‌ :: 2063‌ جار بینراوە

دواڕۆژ، عەلی حەمەسەعید


ئێوارەی ئەمڕۆ یەکشەممە 19ى ئایار، بەهۆی وەرگەڕانی ئۆتۆمبێلێک لەسەر ڕێگەی سەرەکی هەڵەبجە-هەورامان، هەشت کەس برینداربوون، وتەبێژی هاتوچۆی هه‌ڵه‌بجه‌ش ده‌ڵێت: "برینی پێنج له‌ برینداره‌كان سەختە".


سەڵاح عەلی، وتەبێژی بەڕێوەبەرایەتی هاتوچۆی هەڵەبجە بە دواڕۆژی راگەیاند: "سەرلە ئێوارەی ئەمڕۆ لەسەر رێگەی سەرەکی هەڵەبجە-هەورامان لە نزیک بازگەی (دەرەشیش) لە ئەنجامی وەرگەڕانی ئۆتۆمبێلێکی بارهەڵگر لە جۆری (تۆیۆتۆ هایلوكس) هەشت کەس برینداربوون کە سەرجەمیان خزم و کەسی یەکترن".

وتیشى: "بەوتەی یەکێک لە سەرنشینە بریندارەکانی ناو ئۆتۆمبێلەکە، هۆکاری رووداوەکە بۆ ئەوە دەگەڕێتەوە کە شۆفێری ئۆتۆمبێلەکە بەهۆی ماندوبوونەوە لەکاتی لێخوڕینی ئۆتۆمبێلەکەدا خەوی لێکەوتووە، بەوهۆیەشەوە لەشەقامە سەرەکییەکە لایداوە و چوەتە چەمێکەوە و ئۆتۆمبێلەکەش وەرگەڕاوە".

وتەبێژی هاتوچۆی هەڵەبجە ئەوەشی خسته‌ڕوو: "لێکۆڵینەوەی زیاتر لە رووداوەکە دەستیپێکردووه‌. هاوکات بەهۆی سەختی برینەکانیانەوە پێنج لە بریندارەکان رەوانەی نەخۆشخانەی فریاکەوتنی سلێمانی کراون، بریندارەکانی دیکەش لە نەخۆشخانەی فریاکەوتنی هەڵەبجە چارەسەریان بۆ دەکرێت".

پ: ئا.ح

بڵاوکردنەوە: چ.ع



created by Avesta Group and powered by Microsoft Azure