كشانەوەی کۆمپانیای ئیکسۆن مۆبیل زیانی بۆ ھەرێم دەبێت؟

هەواڵ / ئابوری :: 19/05/2019‌ :: 277‌ جار بینراوە

دواڕۆژ، زریان محەمەد


دوای ئەوەی گەورە کۆمپانیای ئەمریکی ئیکسۆن مۆبیل بۆ دەرھێنانی نەوت لە عێراق کشانەوەی خۆی ڕاگەیاند، ئەو بڕیارە لەچەند بارێكدا سوود و زیانی خۆی دەبێت لەسەر ھەرێم.


ئەم کشانەوەیە لەچوارچێوەی ئەو پێشهاتە نوێیانەدایە ئەمریکا دەیانگرێتەبەر بۆ پاراستی گیانی هاووڵاتیانی خۆی.

وریا حسێن، سەرۆکی ڕێکخراوی دۆر بۆ زانیاری نەوت دەربارەی کشانەوەی ئیکسۆن مۆبیل لە کیڵگەی قوڕنە، دەربارەی ئەوەی بۆ ھەرێم زیانی دەبێت یانا؟ بەدواڕۆژی وت: "ئەوەندەی زانیاری هەبێت ئیکسۆن مۆبیل کارمەندە باڵاکانی خۆی لەوێنەی ستافی ئەندازیاری و بەڕێوەبردن کشاندووەتەوە و لەشوێنیان ستافی عێراقی دانراوە، بۆیە ئەم هەنگاوە ئەگەر درێژەنەکێشێت هەنگاوێکی مەترسیدار نابێت بۆ نەوتی عێراق، چونکە ئێستا کیڵگەی قوڕنەی یەک نەوەستاوە و کاردەکات".

وتیشی: "بەبڕوای من ئەم دۆخە لەنزیک مەودادا کاریگەری نابێت، بەڵام درێژەکێشانی ئەگەری هەیە کێشە بۆ بەرهەمی ئەو کیڵگەیە دروستبکات کە داوجار هەناردە کەمبێتەوە و داهاتیش کەمدەکات".

ئاماژەی بۆ ئەوەکرد: ئەم کشانەوەیە کاریگەری دەبێت بەباری سلبی و ئیجابی، لەبارە سلبییەکەدا لەئەگەری کەمبوونەوەی هەناردەی نەوتی عێراق بودجەی عێراق کورتدەهێنێت کە ئەگەرێکی لاوازە، ئەوکات بودجەی هەرێمیش کەمدەکات.

بەوتەی وریا حسێن، بارە ئیجابییەكەش ئەوەیە ئەم كشانەوەیە ڕەنگە هاندانێکی باشبێت بۆ ئەوەی عێراق بیر لە بەدیلی قوڕنە بکاتەوە کە ئەویش زیادکردنی ئاستی هەناردەی نەوتەكەیەتی لەڕێگەی زیادکردنی بەرهەمی کەرکوکەوە بەڕێکكەوتن لەگەڵ هەرێمی کوردستان، ئەمەش دواجار بەسودی هەرێم دەبێت، بەڵام ئەگەر دۆخەکە زۆر نەخایەنێت، ڕەنگە هیچ کام لەم ئەگەرانە ڕوونەدەن.

ئاژانسی ده‌نگوباسی رۆیته‌رز دوێنێ ئاشكرایكرد كه‌ كۆمپانیای ئیكسۆن مۆبیل كارمه‌نده‌كانی له‌ كێڵگه‌ی قورنه‌ی یه‌ك له‌ رۆژئاوای شاری به‌سڕه‌ چۆڵكردووه‌.

ئاژانسه‌كه‌ ئاماژه‌ی به‌وه‌شداوه‌ كه‌ سه‌ره‌ڕای كشانه‌وه‌ی كارمه‌ندانی كۆمپانیاكه‌ رێژه‌ی به‌رهه‌مهێنانی نه‌وت له‌و كێڵگه‌یه‌ نه‌گۆڕدراوه‌.

پێداچوونەوە: ئارام غەفور 

بڵاوکردنەوە: ئیحسانی مەلا فوئاد



created by Avesta Group and powered by Microsoft Azure