بەرگری شارستانی هەڵەبجە داوایەكی بەپەلە ئاڕاستەی هاوڵاتیان دەكات

هەواڵ / کوردستان :: 17/05/2019‌ :: 288‌ جار بینراوە

دواڕۆژ، عەلی حەمە سەعید


بەهۆی بەرزبوونەوەی پلەكانی گەرما و بۆ روونەدانی ئاگر، وتەبێژی بەرگری شارستانی هەڵەبجە داوایەكی بە پەلە ئاڕاستەی هاوڵاتیان دەكات.


زانیار عومەر، وتەبێژی بەرگری شارستانی هەڵەبجە بە دواڕۆژی ڕاگەیاند: بەهۆی هاوسنوریی پارێزگای هەڵەبجە لەگەڵ ئێراندا ساڵانە زۆرترین حاڵەتی ئاگركەوتنەوە لە ناوچە سنورییەكانی گوندەكانی سەر بە هەڵەبجە و ئێراندا ڕوو دەدەن، بەڵام ئەمساڵ بۆ كەمركردنەوەی زیانەكانی ئاگر كەوتنەوە، بە هەماهەنگی لەگەڵ پۆلیسی دارستان و قایمقامیەت و سەرۆكایەتی شارەوانی و چەند لایەنێكی دیكەی پەیوەندیداری هەڵەبجە، دەستمان بە لێدانی ئاگربڕ كردووە لە گوند و ناوچە سنورییەكان.


ئاماژەی بەوەشكرد، بۆ ئەمساڵ دانیشتووانی چەند گوندێكی نزیك سنوری ئێران بەتایبەت گوندەكانی (هاوار و دەرەتوێ‌ و هەوارە كۆن) پەیوەندییان پێوە كردوین بۆ ئەوەی لەوێش ئاگر بڕ لێبدرێت، هاوكات خودی ئەو گوندنشینانەش هاوكارمانن، بۆیە لە دوێنێوە دەستمان بە لێدانی ئاگر بڕ كردووە بۆئەوەی كەمترین زیان بە ژینگە و سروشتی ناوچەكە بگات و كەمترین حاڵەتی ئاگركەوتنەوەش تۆمار بكرێت.


وتەبێژەكەی بەرگری شارستانی هەڵەبجە دەڵێت: "لەمەولا پلەكانی گەرما بەرەو بەرزبوونەوەی زیاتر دەچن و گژوگیا و دانەوێڵەی هاوڵاتیانیش بەرەو وشكبوون دەچن، بۆیە زۆر گرنگە لە حاڵەتی پێویست نەبێت لە دەشت و دەرەكاندا ئاگر نەكەنەوە، ئەگەریش ئاگریان كردەوە دڵنیاببنەوە لە كوژاندنەوەی پاشان ئەو جێگایە جێبهێڵن، چونكە لەساڵی ڕابوردوو زۆربەی حاڵەتەكانی ئاگر كەوتنەوە بەهۆی كردنەوەی ئاگر پاشان نەكوژاندنەوەی تۆماركراون".


پێداچوونەوە و بڵاوكردنەوە: ئارام غەفور 



created by Avesta Group and powered by Microsoft Azure