دوبز..عەرەب دەستیکردووە بەدروێنەی بەرهەمی ئەمساڵی جوتیارانی کورد

هەواڵ / کوردستان :: 17/05/2019‌ :: 289‌ جار بینراوە

دواڕۆژ، عیماد جەباری

لەگوندەکانی (مامە، شیریناو و تەقتەق)ی سەر بەقەزای دوبز ( 40 کیلۆمەتر رۆژئاوای کەرکوک ) عەرەبە هاوردەکان چوونەتە سەر بەرهەمی ساڵێکی ماندوو بوونی جوتیارانی کورد و دەستیانکردووە بەدوورینەوەی گەنم و جۆکانیان.


هێرش حسێن یەکێک لە جوتیارانی گوندی مامەیە کە زەوییەکەی دوراوەتەوە (ئەمڕۆ هەینی 17ی ئایاری 2019) بەدواڕۆژی راگەیاند: ئەمساڵ لەزەوییەکانمان تۆو مان وەشاندووە و جوتمان کردووە و ئێستا گەیشتووەتە بەرهەم، کەچی دوێنێ عەرەب چونەتە سەری و دوریویانەتەوە کە 120 دۆنم زەوییە.

وتیشی: "زەوی جوتیارانی گوندەکە زیاتر لە 6 هەزار دۆنمە و جارێ عەرەبەکان لەزەوییەکەی منەوە دەستیانپێکردووە و دەراسەکانیشیان لەزەوییەکانی دیکە بەردەوامە، ئەوان رۆژانی هەینی و شەمەیان قۆستوەتەوە بۆ ئەوەی زەوییەکان بدورنەوە، چونکە ئەگەر سکاڵاش تۆمار بکەین، دەبێت چاوەڕێی یەکشەممە بكەین".

لەگوندەکانی شیریناو و تەقتەقیش بەهەمان شێوە عەرەبە هاوردەکان دەستیانکردوە بەدورینەوەی بەرهەمی گەنم و جۆی ئەمساڵ بۆ خۆیان و پێشتریش لەگوندی قەرەدەرە دەراسەکانیان راسپاردبوو دروێنە بۆ کورد نەکەن، چونکە زەوییەکان هی ئەوانە و بەرهەمەکەیان دەوێت.

شاهین بەرهەم جوتیارێکی رەسەنی گوندی شیریناوە بەدواڕۆژی وت: "ئەو عەرەبانەی دەستیان گرتووە بەسەر زەوییەکانیاندا خەڵکی دیوانیەن و بنەماڵەی کازم هانی-ن کە لەدوای ساڵی 2003 قەرەبوی مادەی 140 یشیان وەرگرتووە".

وتیشی: "زەوییەکەم 90 دۆنمە و بەرهەمی ئەمساڵیان بۆ خۆیان دروێنە کردووە و بەهاوبەشی لەگەڵ عەرەبێکی ناوچەکەدا بردویانە، خانووەکانیشمان لەنێو گوندەکەدا رووخێندراون".

لەگوندی شیریناو زەوی 40 جوتیار دەستی بەسەرداگیراوە لەلایەن کوڕەکانی کەسێک بەناوی (کازم هانی) کە خەڵکی دیوانییەن و پێشتر لەلایەن سەدام حسێنەوە زەوییەکانیان پێدراوە.

خەڵکی گوندەکە لەساڵی 1975 وە لەسەر زەویەکانیان دەرکراون و دراونەتە ئەو عەرەبانە، تاوەکو ساڵی 2003 گەڕاونەتەوەو بێ هێزی کوردیان قۆستوەتەوەو جارێکیتر دەستیان گرتوە بەسەر زەوییەکاندا.

پێداچوونەوە و بڵاوكردنەوە: ئارام غەفور 



created by Avesta Group and powered by Microsoft Azure