رۆژنامەنوسە دەستگیرکراوەکانی کەرکوک بەکەفالەت ئازادکران

هەواڵ / کوردستان :: 14/05/2019‌ :: 310‌ جار بینراوە
هه‌شت كاتژمێر ده‌ستبه‌سه‌ربوون

دواڕۆژ، عیماد جەباری

دوای هەشت کاتژمێر سێ رۆژنامەنوسە دەستگیرکراوەکەی گوندی پەڵکانەی ناحیەی سەرگەڕان بەکەفالەتی پێنج ملیۆن ئازادکران.


دەستگیرکراوەکان بریتیبوون لە ئاسۆ ئەحمەد، پەیامنێری کەناڵی ئێن ئاڕ تی و وێنەگرەکەی لەگەڵ کاروان ساڵەیی، پەیامنێری سایتی کەرکوک ناو کە بەمەبەستی روماڵکردنی رووداوەکانی (ئەمڕۆ سێشه‌ممه‌ 14ى ئایارى 2019)ی گوندی پەڵکانە چوبونە سنورەکە و لەلایەن فەوجی مغاویری فیرقەی 14ی سوپای عێراقەوە دەستگیرکرابون.

ئاسۆ ئەحمەد، بە دواڕۆژی وت: کاتژمێر 12ی نیوەڕۆ گەیشتینە گوندەکە، بەڵام رێگریان لێکردین روماڵبکەین و لەکاتی گەڕانەوەمان لە رێگە دەستگیرکراین و لەگەڵ دەستگیرکراوەکانی گوندەکە خراینە بۆدی مێکزەمینیەوە و قۆڵبەستکراین و ئەشکەنجەی زۆر دراین.

وتیشی: "هێزەکەی عێراق رێگەیانەدا بەزمانی کوردی قسە بکەین و دوای ئەوەی بەڵێننامەیان پێپڕکردینەوە لەنزیک کاتی بانگی مەغریب گواستمانیانەوە بۆ بنکەی پۆلیسی سەرگەڕان".

ئه‌و رۆژنامه‌نوسانه‌ (کەمێک بەر لە ئێستا) بە کەفالەتی پێنج ملیۆن دینار ئازادکراون و بڕیارە سبەی لەبەردەم دادگا ئامادەبن.

نیوەڕۆی ئەمڕۆ دوای ئەوەی زیاتر لە 200 چەکداری عەشیرەتی شمەر بەپاڵپشتی فەوجی مغاویری فیرقەی 14 دەستیان بەسەر خانوی ماڵە کوردەکانی گوندی پەڵکانەدا گرت بەهۆیەوە ئاڵۆزی لێکەوتەوە و زیاتر لە 30 هاوڵاتی دەستگیرکران.

ئه‌مه‌ش له‌كاتێكدایه‌ لە گوندی قەرەدەرەی سەر بەقەزای دوبز (40 کیلۆمەتر رۆژئاوای کەرکوک) ژمارەیەک لە عەرەبە هاوردەکان رێگەنادەن جوتیارە کوردەکان دروێنە بکەن.

پێشتر فەتاح حاجی موشیر، سەرپەرشتیاری کۆمیتەی دوبزی یەکێتیی نیشتمانیی کوردستان بە دواڕۆژی راگەیاند: ماوەی سێ رۆژە عەرەبە هاوردەکان گەڕاونەتەوە سنوری گوندی قەرەدەرەی کوردنشین و دەڕاسەکانیان راسپاردوە کە چیتر بۆ کورد دروێنە نەکەن، چونکە زەوی ئەوانە.

وتیشی: "ئەو عەرەبانە ئێستا گەڕاونەتەوە و داوای زەوییەکان دەکەن لەکاتێکدا زەوی کوردن". 

پێداچونه‌وه‌: شیروان شه‌ریف



created by Avesta Group and powered by Microsoft Azure