باوكى یه‌كێك له‌ 18 شۆفێره‌كه‌ى كه‌ركوك: کوڕەکەم بۆ ئیش رۆیشت و ته‌رمه‌كه‌یم هێنایه‌وه‌

هەواڵ / ڕاپۆرت :: پێش 2 هەفتە ‌ :: 505‌ جار بینراوە

دواڕۆژ، عیماد جەباری

كاتێك نازم رێگه‌ى به‌ شاڵاوى كوڕیدا به‌ ته‌كسییه‌كه‌ى كه‌سێك بگه‌یه‌نێته‌ سلێمانى هه‌رگیز به‌مێشكیدا نه‌هاتبوو كه‌ ئه‌وه‌ دواین رێگه‌پێدان و بینینه‌وه‌یه‌تى. 


ئه‌وه‌ى ئازاره‌كه‌ى بۆ باوكى شاڵاو زیاتر كرد هه‌واڵى دۆزینه‌وه‌ى ته‌رمه‌كه‌ى بوو له‌ شوێنێكى فڕێدانى خاشاك و له‌چوارچێوه‌ى به‌ ئامانجگرتنى شۆفێرانى ته‌كسى كه‌ركوك له‌لایه‌ن باندێكى تاوانه‌وه‌ كه‌ به‌وه‌وه‌ 18 شۆفێریان به‌و ده‌رده‌ گه‌یاند.

پێنجشه‌ممه‌ى رابردوو 9ى ئایار دادگای تاوانه‌کانی سلێمانی/ 3 سزای بۆ سێ تاوانبارى باندێكى حه‌وت كه‌سى دەركرد كە لەساڵی 2013دا 18 شۆفێری تاكسیان لە سنوری قەزای چەمچەماڵ كوشت دوای ئەوەی لەناو شاری كەركوكەوە رفاندبویانیان.

دادگا بۆ هەر یەكێك لەو سێ تاوانبارە سزای (15) جار لەسێدارەدانی دەركردوە و هێشتا چوار تاوانباری دیكەیان ماون و لەچاوەڕێی وەرگرتنی سزاكانیاندان.

ئەگەرچی شەش ساڵ بەسەر رووداوەكەدا تێپەڕیوە، بەڵام كەسوكاری قوربانیان هێشتا برینی لەدەستدانی رۆڵەكانیان ساڕێژ نەبووە، وەك خۆشیان ئاماژەی بۆ دەكەن بەدرێژایی ئه‌و ماوه‌یه‌ بە رێگەی دادگای سلێمانیەوە بوون و تاوەكو ئێستاش هۆكاری كوشتنی كوڕەكانیان لەلایەن ئەو گروپەوە نازانن.

كوشتنی 18 شۆفێری تەكسیەكە لە ماوه‌ى 9 مانگدا روویدا، بەشێوەیەك یەكەم حاڵەتی بێسەروشوێنبونی یەكەم شۆفێریان لە 18ی ئازاری 2013 تۆماركرا، تاوەكو لە 2ی تشرینی دووەمی 2013 توانرا تاوانبارەكان دەستگیربكرێت و بۆ ئاشكراكردنی بەڵگە و دۆزینەوەی شوێنی تەرمەكان برانە شوێنی تاوانەكە.

نازم حەمەعوسمان، باوكی (شاڵاو) كه‌ یەكێكه‌ لە قوربانیانی تاوانەكە بۆ دواڕۆژ وتى: "بەدرێژایی 5 ساڵ بەردەوام بەرێگەی دادگاوە بووم، بەڵام ئەوە ساڵێكە بانگهێشت نەكراوم، لە دادگادا بەردەوام سێ كەسیان لە تاوانبارەكان دەهێنا كە عەرەب بوون، بەڵام ئێمە نە قسەمان لەگەڵ كردوون نە دەشزانین بۆ مناڵەكانمانیان كوشتوە و تەنانەت زانیاریشیان لەبارەی رووداوەكەوە پێنەداوین".

شاڵاو نازم، لەدایكبوی ساڵی 1993، لەكاتی رووداوەكەدا لە قۆناغی یەكەمی زانكۆ دەبێت و بۆ دابینكردنی بژێوی ژیانی و پێداویستى خوێندنه‌كه‌ى لەلایەن باوكیه‌وه‌ ئۆتۆمبێلێكی تاكسی لەجۆری كرۆلا بیكاشۆی بۆ دەكڕدرێت، بەڵام مانگێك بەسەر كڕینی ئۆتۆمبێلەكەی تێناپەڕێت و بێسەروشوێن دەبێت.

باوكی شاڵاو بەحەسرەتەوە باس لەدوایین جار دەكات كە لەگەڵ كوڕەكەی قسەى كردوە و دەڵێت: "لەلایەن كەسێكی عەرەبەوە تەلەفۆنێك بۆ شاڵاو كرا بۆ ئەوەی بە كرێ لەگەڵیدا بچێت بۆ سلێمانی و خێزانەكەی بهێنێتەوە، كاتێك پێیوتم كە كرێیەكی هەیە بۆ سلێمانی منیش رێگەم پێدا، تەنانەت پێموت قەیچێكە بڕۆ خۆ رێگەی حەویجە و دوز نیە، چونكە ئەوكاتە ئەو ناوچانە مەترسیداربوون".
 
بێسەروشوێنبوونی شاڵاو و پێشتریش ژمارەیەكی دیكەی شۆفێر وادەكات كە هێزە ئەمنیەكان هەست بە بابەتێكی مەترسیدار بكەن، دوای دوو رۆژ لەكاتی بەدواداچوون بۆ كامێرای چاودێری بازگەی بانی مەقان، شاڵاو دەبینرێت كه‌ كەسێكی لەگەڵە و لەئاستی كامێرەكەدا دەست دەنێت بەسەر چاویه‌وه‌، ئەوەش ئەوەندەی دیكە گومانەكان زیاتر دەكات بەوپێیەی ئۆتۆمبێلەكە و شاڵاو لەنێوان چەمچەماڵ و تەكێدا دیارنامێن.

تۆماره‌كه‌ ده‌بێته‌ سه‌ره‌داوى زانیارییه‌كان، تاوەكو لەدوای 9 مانگ بەدواداچوون و لێكۆڵینەوە توانرا زانیارى ته‌واو دەستی ئاسایشی كەركوك بكەوێت و بەهەماهەنگی لەگەڵ بەڕێوەبەرایەتی ئاسایشی خۆرئاوای سلێمانی هه‌ندێك له‌ تاوانبارەكان دەستگیربكەن كە لە نەتەوەی عەرەب و خەڵكی شارە جیاوازەكانی عێراق بوون.

دوای دانپێدانانی تاوانباران تەرمەكەی (شاڵاو) لەگەڵ سێ شۆفێری دیكەدا لە شوێنێكی تایبەت بە فڕێدانی خاشاك لەنێوان قەزای چەمچەماڵ و ناحیەی تەكێدا دەدۆزرێتەوە كە بەوتەی باوكى لەرێگەی پشكنینی دی ئێن ئەیەوە توانرا تەرمەكە بناسرێتەوە و وەریبگرنەوە.

لەو سەردەمەدا تا دەهات پرسی بێسەروشوێنبونی شۆفێری تاكسیەكان لەنێو كەركوكدا گەورەتردەبو، بەشێوەیەك كەم شۆفێری تاكسی هەبو ئەم چیرۆكەی نەبیستبێت كە بەتەواوەتی ترس و دڵەڕاوكێی لەلایان دروستكردبو، بەتایبەت دوای ئەوەی لەكامێرای چاودێری بازگەی بانی مەقان تەواوی شۆفێرەكان دەبینران كە كەسێكیان لەگەڵدایە و دواتر شوێنەواریان بزردەبو.

كەریم محەمەد، كه‌ ئامۆزای یەكێكى تره‌ لە شۆفێرە قوربانیەكان بەناوی (كاروان سەلیم) بۆ دواڕۆژ وتى: "لەدوای ئاشكرابونی تاوانەكە و دەستگیركردنی ئەنجامدەرەكانی، بەدرێژایی ئەم ساڵانە بەردەوام مام و ئامۆزاكەم بەرێگەی دادگاوە بوون".

ئه‌و كه‌ تاكە ئەندامی خێزانەكەیەتی تاوەكو ئەم ساتە ئاگاداری سزاكەی دادگا سلێمانیە و دڵی نەهاتووە هەواڵەكە بە مامی واتا (باوكی قوربانیەكە) بدات، وتیشی: "كاروان-ى ئامۆزام تاكە قوربانی ئەو رووداوەیە كە تاوەكو ئێستا تەرمەكەیمان نەدۆزیوەتەوە و پرسەشمان بۆ دانەناوە، هەرچەندە یەكێك لە تاوانبارەكان دانی بە كوشتنیدا نا و شوێنێكی دەستنیشانكرد كە لەوێ تەرمەكەی ژێر خۆڵ كردووە، بەڵام بێسود بو نەدۆزرایەوە".

كاروان لەدایكبووی ساڵی 1987، دەرچوی كۆلێژی یاسای زانكۆی كەركوك بوو، بەوپێیەی كوڕه‌ گەورەی ماڵەكە دەبێت، ئۆتۆمبێلێكی تاكسی لەجۆری (یارس) دەكڕێت بۆ ئەوەی هاوكاری باوكی بكات لە دابینكردنی بژێوی خێزانەكەی، به‌ڵام مه‌رامى تاوانكاران ئه‌و ویسته‌ى له‌بارده‌به‌ن.

ئەفسەرێك لەئاسایشی كەركوك، كە لەنزیكەوە ئاگاداری ئەو دۆسێیەیە، بەڵام نەیویست ناوی ئاشكرابكرێت، بۆ دواڕۆژ وتی: "ئەو گروپەی تاوانەكەیان ئەنجامدابوو سەر بە رێكخراوی تیرۆریستی قاعیدە بوون و لەلایەن كەسێكی كوردەوە سەرپەرشتی دەكران كە لە ئەوروپاوە گەڕابووە و كێڵگەیەكی لەنێوان چەمچەماڵ و تەكێدا بەكرێگرتبو، تێدا شۆفێرەكانیان كوشتبوو و دواتر تەرمەكانیان هەر لەو سنورەكە شاردبوەوە، بەڵام لەدوای دەستگیركردنی گروپەكە كە عەرەب بوون، سەرۆكەكەیان بەرەو دەرەوەی وڵات هەڵات و تاوەكو ئێستاش دەستگیرنەكراوە".

وتیشی: "مەبەست لە رفاندنی شۆفێرەكان و كوشتنیان لە سنوری پارێزگای سلێمانی لەلایەن ئەو گروپەوە بۆ شێواندن و تێكدانی دۆخی كەركوك بو، چارەنوسی ئۆتۆمبێلەكانیش ئەوەبو كە لە بازاڕەكاندا ساغیان كردبوەوە".

ئەو تاوانبارانەی سزای لەسێدارەدانیان بۆ دەرچووە لەسەر كوشتنی شۆفێری تاكسیەكانی كەركوك بریتین لە (ئەحمەد مستەفا عەبدولمەهدی، حسێن شەعلان فەزاع و حەمدان سەرحان فەرز) ئەمەش بەوتەی موقەدەم زمناكۆ عومەر، وتەبێژی ئاسایشی رۆئاوای سلێمانی.

بەوتەی ئەو ئەفسەرەی ئاسایش، هێشتا چوار تاوانباری دیكە لەسەر هەمان دۆسێ لە زیندانن و چاوەڕێی وەرگرتنی سزاكانیانن.

داڕشتنه‌وه‌: شیروان شه‌ریف

بڵاوکردنەوە: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە