شه‌ڕێ بازرگانیێ تركیا دژى هه‌رێما كوردستانێ ل ئۆڤاكۆ به‌رده‌وامه‌

هەواڵ / ڕاپۆرت :: پێش 2 هەفتە ‌ :: 170‌ جار بینراوە
نه‌خشه‌یا ده‌روازه‌یێ ئۆڤاكۆ

تاگ :: ڕاپۆرت

دواڕۆژ، دهۆك

هه‌ولێن تركیا بۆ رێككه‌ڤتن دگه‌ل ئیراقێ بۆ ڤه‌كرنا ده‌روازه‌كێ نوو ل شوونا ئیبراهیم خه‌لیل ل قه‌زا زاخۆ یا ئیراقێ به‌رده‌وامن.

ئه‌و ده‌روازێ تركیا دخوازیت تازه‌ دگه‌ل ئیراقێ ڤه‌كه‌ت دكه‌ڤیته‌ ده‌ڤه‌را ئۆڤاكۆ‌ یا هه‌ڤسنوور دگه‌ل ئیراقێ كو 25 كیلۆمه‌تران دكه‌ڤیته‌ رۆژئاڤایێ ده‌رگه‌هێ ئیبراهیم خه‌لیل، تركیا دخوازیت ب ڤى ده‌روازه‌ی راسته‌وخوه‌ كه‌لوپه‌لان ‌ڤه‌گۆهێزیت ته‌له‌عفه‌ر و هه‌رێمێن سوننه‌یان و باشورێ ئیراقێ.

ل گۆره‌ى دیتنێن شاره‌زاییان "ژ بلى كو ده‌روازه‌یێ ئۆڤاكۆ دێ قه‌باره‌یێ بازرگانیا تركیا دگه‌ل ئیراقێ زێده‌كه‌ت، دهه‌مان ده‌مدا دێ بیته‌ شوونگرێ ده‌ر‌وازه‌یێ ئیبراهیم خه‌لیل كو ئه‌ڤه‌ژى دێ بیته‌ شه‌ڕه‌كێ بهێز یێ تركیا به‌رامبه‌ر ئابۆرێ هه‌رێما كوردستانێ، چودى تركیا پێدڤى ب قه‌نجی و منه‌تێن هه‌رێما كوردستانێ نابیت تا كه‌لوپه‌لێن خوه‌ ڤه‌گۆهێزیت ئیراقێ".

هه‌ولێن تركیا بۆ ڤه‌كرنا ده‌روازه‌كى ل شوونا ئیبراهیم خه‌لیل 
پشتى سالا 1991-ێ، توركیا هه‌ولدان دگه‌ل رژێما سه‌دام حسێن، ده‌رگه‌هێ ئۆڤاكۆ دگه‌ل ئیراقێ ڤه‌كه‌ت، لێ ده‌مێ هێزێن ئیراقێ ژ ته‌له‌عفه‌ر هه‌ولداین به‌ر ب سنوورێ ئۆڤاكۆ بچن، باله‌فڕێن ئه‌مریكا ل بنگه‌هێ ئه‌نجه‌رلیك ل تركیا رێگرى ل له‌شكه‌رێ ئیراقێ كر. دووه‌م هه‌ولا جدى یا تركیا بۆ ڤه‌كرنا ڤى ده‌روازه‌ی پشتى ریفراندۆما سه‌رخوه‌بوونا كوردان بوو ل هه‌رێما كوردستانێ كو25-ێ ئه‌یلولا سالا2017-ێ، ئه‌نجامدابوو.

رێككه‌ڤتن دناڤبه‌را تركیا و ئیراقێ دا نه‌هاتینه‌ ئیمزاكرن
تا نوكه‌ چو رێككه‌فتن دناڤبه‌را ئیراقێ و تركیا دا لسه‌ر ڤه‌كرنا ده‌روازه‌یێ ئۆڤاكۆ نه‌هاتینه‌ ئیمزاكرن، لێ پشتى كۆربه‌ندا (توركێت- عێراق) ل 24-ێ نیسانا ئه‌ڤ ساله‌ ل به‌غدا، محه‌مه‌د هاشم عانى، وه‌زیرێ بازرگانیا ئیراقێ گۆت: "لیژنه‌ك ژ وه‌زاره‌تا بازرگانى و ڤه‌گۆهاستن و گه‌هاندنێ و وه‌زاره‌تا ده‌ر‌ڤه‌ و فه‌رمانگه‌ها گۆمركان به‌رده‌وام دانوستاندنان دگه‌ل حكومه‌تا تركیا دكه‌ن و كارێ ڤه‌كرنا ده‌روازه‌كێ نوو دگه‌ل ئیراقێ باش برێڤه‌دچن، ده‌مه‌كێ نێزیك ئه‌و ده‌روازه‌ دێ هێته‌ ڤه‌كرن".

مه‌دیایا وه‌لاتێ ئیرانێ، ده‌ربا‌ره‌ى سه‌ره‌دانا وه‌زیرێ ده‌ر‌ڤه‌یێ تركیا مه‌ولۆد چاوش ئۆغلۆ یا 27-ێ نیسانا ئه‌ڤ ساله‌ ل به‌غدا، خوه‌یاكربوو "وه‌زیرێ ده‌رڤه ‌یێ تركیا د سه‌ره‌دانا خوه‌دا داخواز ژ به‌رپرسێن ئیراقێ كر له‌زێ ل ڤه‌كرنا ده‌روازه‌یێ ئۆڤاكۆ بكه‌ن".

ئارمانجێن تركیا:
د. به‌یار مسته‌فا، شاره‌زایێ كاروبارێن تركیا و ماموستایێ زانینگه‌ها ئه‌مریكى ل دهۆك بۆ دواڕۆژ دازانین: "تركیا چوار ئارمانج ژ ڤه‌كرنا ده‌روازه‌یێ ئۆڤاكۆ هه‌نه‌:
- توركیا پێدڤى ب هه‌رێما كوردستانێ نه‌بیت كو ده‌رگه‌هێ ئیبراهیم خه‌لیل بكاربینیت.
- گه‌هشتنا كه‌لوپه‌لێن تركیا بۆ ناڤه‌راست و باشورێ ئیراقێ ب ره‌نگه‌كێ راسته‌وخوه‌.
- تركیا ب رێكا ئیراقێ بگه‌هیت وه‌لاتێ ئوردن.
- توركیا ب رێكا ئیراقێ بگه‌هیت وه‌لاتێن كه‌نداڤى.

ل هه‌رێما كوردستانێ و ئیراقێ چو ده‌نگێن نه‌رازیبوونێ به‌رامبه‌ر ڤه‌كرنا ده‌رگه‌هێ ئۆڤاكۆ نه‌بووینه‌، ئه‌حمه‌د حاجى ره‌شید، ئه‌ندامێ جڤاتا نوونه‌رێن ئیراقێ بۆ دواڕۆژ گۆت: "ل گۆره‌ى ده‌ستوورێ ئیراقێ، وه‌لاتێ ئیراقێ ماف هه‌یه‌ ل سنوورێن هه‌رێما كوردستانێ دگه‌ل وه‌لاتێن جیران ده‌روازه‌یێن نوو ڤه‌كه‌ت، حكومه‌تا هه‌رێما كوردستانێ ژى د ئیداره‌كرنا وان ده‌روازه‌یان دا پشكداربیت".

"ده‌مێ بازرگانێن تركان كه‌لوپه‌لێن خوه‌ دبه‌ن ئیبراهیم خه‌لیل، گه‌له‌ك گۆمرك ژ وان دهێته‌ وه‌رگرتن"
ده‌رباره‌ى ڤێ مژارێ ئۆزگۆر مه‌همه‌ت ئۆغلۆ، رێڤه‌به‌رێ تێكله‌یێن ژۆرا بازرگانیا ئامه‌د ل باكورێ كوردستانێ بۆ دواڕۆژ گۆت: "ده‌مێ بازرگانێن تركان كه‌لوپه‌لێن خوه‌ دبه‌ن ئیبراهیم خه‌لیل، گه‌له‌ك گۆمرك ژ وان دهێته‌ وه‌رگرتن.  له‌وارا گه‌له‌ك ژوان به‌رێ خوه‌ ده‌نه ‌وه‌لاتێ ئیرانێ".
لدۆر هه‌ولێن بله‌زیێن تركیا بۆ ڤه‌كرنا ده‌روازه‌كێ نوو دگه‌ل ئیراقێ ناڤبۆرى ئینازمان: "تركیا د قه‌یرانه‌كا مه‌زن دایه‌، ئێدى پتر پێدڤییا تركیا ب بازارێ ئیراقێ هه‌یه‌، له‌ورا ئه‌و وه‌لات دخوازیت ده‌روازه‌كێ نوو دگه‌ل به‌غدا ڤه‌كه‌ت. ره‌وشا ئابورى یا خه‌لكێ تركیا رۆژ لدووڤ رۆژێ به‌ر ب خرابوونێ دچیت، ته‌نانه‌ت پارێ تركیا ژ پارێ سوریا و ئیراقێ بێ به‌هاتر لێهاتیه‌".

كارگه‌ریا ئۆڤاكۆ لسه‌ر دهۆك
ده‌روازه‌یێ ئیبراهیم خه‌لیل، قازانجه‌كا راسته‌وخوه‌ بۆ پارێزگه‌ها دهۆك هه‌یه‌. 70% ژ كۆمپانیێن بازرگانى ل دهۆك كه‌لوپه‌لێن تركیا ژ ده‌روازه‌یێ ئیبراهیم خه‌لیل ڤه‌دگۆهێزن مووسل و باژارێن دى یێن ئیراقێ.
ئه‌یاد حه‌سه‌ن، سه‌رۆكێ ژۆرا بازرگانی و پیشه‌سازییا دهۆك بۆ دواڕۆژ راگه‌هاند: "ئه‌گه‌ر تركیا و ئیراق لسه‌ر ڤه‌كرنا ده‌رگه‌هێ ئۆڤاكۆ رێككه‌ڤتن دێ كاریگه‌ریه‌كا خراپ لسه‌ر بازرگانیا ئیبراهیم خه‌لیل چێبیت، چنكو وى ده‌مى تركیا پێدڤى ب ئیبراهیم خه‌لیل نابیت".

ل گۆره‌ى دوماهیك ئامارێن وه‌زاره‌تا بازرگانیا ئیراقێ، سالا 2018-ێ، قه‌بارێ ئالۆگۆریا بازرگانى ل ده‌روازه‌یێ‌ ئیبراهیم خه‌لیل 13 ملیار دولاربوون، لێ ب ڤه‌كرنا ده‌روازه‌یێ ئۆڤاكۆ ئێدى ئیبراهیم خه‌لیل ئه‌ڤ قه‌بارێ ئالۆگۆریا مه‌زن نامینیت.

پ: ئا.ح
بڵاوكردنه‌وه‌ :هـ.ق



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە