جیهان بە کورتی

هەواڵ / جیهان :: 13/05/2019‌ :: 1858‌ جار بینراوە

تاگ :: جیهان

دواڕۆژ

 
1. رەئی ئەلیەوم- تورکیا ئاشکرایدەکات پڕۆسەی کڕینی موشەکی بەرگری ئاسمانی (ئێس 400) تەواوبووە

رۆژی هەینی فەخرەدین ئەلتۆن، بەرپرسی بازنەی پەیوەندییەکانی سەرۆکایەتی تورکیا ئاشکرایکرد: پڕۆسەی کڕینی موشەکی بەرگری ئاسمانی (ئێس 400)ی روسی تەواوبووە.


2. رەئی ئەلیەوم- لە بۆینس ئایرس پەرلەمانتارێکی ئەرجەنتینی لەبەردەم ئەنجومەنی پیران فیشەکی پێوە دەنرێت و دەکوژرێت

رۆژی یەکەشەممە پەرلەمانتارێکی ئەرجەنتینی تەمەن 61 ساڵ بەناوی هکتور ئۆلیفاریس بەهۆی برینەکانیەوە گیانی لەدەستدا، ئەمەش پاش ئەوەی هەفتەی پێشوو لەبەردەم ئەنجومەنی پیراندا فیشەکی پێوەنرا.

3. سپوتنیک- ئیکوادۆر دۆکیومێنتەکانی ئاسانگ دەدات بە ئەمریکا
حکومەتی ئیکوادۆر چەندین داتای کەسی ئاسانگ-ی داهێنەری ماڵپەڕی (ویکیلیکس) وەک زانیاری مۆبایل و کۆمپیوتەرەکەی ڕادەستی ئەمریکا دەکات.


4. تێک کڕەنچ- بۆیەکەمجار لە مێژوودا ئاستی دوانەئۆکسیدی کاربۆن لە هەوادا 415 بەشی لە ملیۆنێکدا تێپەڕاند
بەپێی ئاژانسی نەتەوەیی بۆ زەریا و چینی هەوا، بۆ یەکەمجار لە مێژووی مرۆڤایەتیدا ئاستی دوانەئۆکسیدی کاربۆن گەیشتە 415 بەش بۆ هەر ملیۆنێک.


5. بی بی سی- سەبارەت بە پەیوەنی بازرگانی نێوان ئەمریکا و چین ترامپ دەڵێت: ئەمریکا لەو شوێنەیە کە خۆمان دەمانەوێت

ڕۆژی هەینی ئەمریکا باجی سەر کەلوپەلە هاوردەکراوەکانی چینی بە بڕی دوو هێندە زیادکرد، دواتر ترامپ لە رێگەی تویتەرەوە نوسی (ئەمریکا لەو شوێنەیە کە خۆمان دەمانەوێت).


6. بی بی سی- ئینستگرام هاشتاگی بابەتە ناڕاستەکانی کوتان دەسڕێتەوە

ئینستگرام بڕیاریداوە ئەو هاشتاگانە لابەرێت کە بۆ بڵاوکردنەوە زانیاری ناڕاست دەربارەی کوتان بەکاردەهێنرێت.


7. کۆمۆ نیوز- لە واشنتۆن چیتر دایکان و باوکان ناتوانن منداڵەکانیان لە کوتان بێبەش بکەن

بەپێی یاسایەکی نوێ چیتر دایکان و باوکانی خەڵکی ویلایەتی واشنتۆن ناتوانن لەبەر هەر هۆکارێک بێت منداڵەکانیان لە کوتانی دڕکەومێکوتە و سورێژە و نیکاف بێبەش بکەن، چونکە ئەمساڵ 70 حاڵەی دڕکەومێکوتە تۆمارکراوە.


8. ژاپۆن تایمز- میوزیکژەنەکانی کۆریای باکور و باشور بەیەکەوە لە چین نمایش دەکەن

کەمانچە ژەنیکی خەڵکی کۆریای باکور بەناوی وۆن هیۆن جوون و گۆرانیبێژێکی کۆریای باشور بەناوی کیم سۆنگ می بەیەکەوە لە چین نمایشێکیان پێشکەش کرد بەهیوای ئەوەی مۆسیقا هەردوو کۆریاکە لەیەکەوە نزیک بکاتەوە.


9. وی فۆڕم- ژمارەیەکی پێوانەیی لە خانووەکانی ئۆسترالیا سەرچاوەی وزەکەیان گۆڕیوە بۆ تیشکی خۆر

بەپێی بازاری وزەی سەوز لە ئوسترالیا رێژەی ئەو خانوانەی سەرچاوەی وزەکەیان گۆڕیوە بۆ تیشکی خۆر بە رێژەی 46% زیادیکردووە و بەهۆیەوە لەماوەی دە ساڵی داهاتوودا 600 ملیۆن دۆلار باجی وزەیان بۆ دەگەڕێتەوە.


10. ئینگاجێت- ئەڵمانیا یەکەم رێگەی خێرایی کارەبایی بۆ بارهەڵگرەکانی بەکاردەهێنێت

ئەڵمانیا هاتە ریزی ئەو وڵاتانەی بۆ پاراستنی ژینگە رێگەی خێرایی کارەبایی بەکاردەهێنێت، بۆ ئەم مەبەستە ڕێگەیەکی 3.1 میلی لە نیوان فرانکفۆرت و دارمستات کردەوە.


11. سپوتنیک- پۆمپیۆ گەشتەکەی بۆ مۆسکۆ هەڵدەوەشێنێتەوە تاوەکو لە برۆکسل گفتوگۆ لەسەر ئێران بکات

 

بەرپرسێکی وەزارەتی دەرەوەی ئەمریکا ئاشکرایکرد مایک پۆمپیۆ سەردانەکەی بۆ مۆسکۆ هەڵوەشاندەوە، بەڵام لە شاری سوچی لەگەڵ ڤلادیمێر پوتین-ی سەرۆکی ڕوسیا و سێرگی لاڤرۆڤ-ی وەزیری دەرەوەی روسیا کۆدەبێتەوە.


12. سپوتنیک- سعودیە: لە هێرشێکی تێکدەردا دوو کەشتی لە نزیک ئیماڕات کرانە ئامانج

 

وەزیری وزەی سعودیە ئاشکرایکرد: سەرلەبەیانی ڕۆژی یەکەشەمە "هێرشێکی تێکدەر" دوو کەشتی لە نزیک ئیمارات کردە ئامانج، بەڵام هیچ زیانێکی ئەوتۆی لێنەکەوتەوە.


13. سپوتنیک- پاش بڵاوبوونەوەی ئاژاوە و توندوتیژی لە وڵاتەکەدا سریلانکا تۆڕە کۆمەڵایەتییەکان بلۆک دەکات

 

بەشی زانیاری حکومەتی سریلانکا ئاشکرایکرد: بەهۆی ڕووداوە توندوتیژییەکانی هەندی بەشی وڵاتەکە بڕیاریاندا تۆڕە کۆمەڵایەتییەکان بلۆک بکەن.


14. هازەلیەوم- ئوردن: لەماوەی تەنیا دوو مانگدا 32 بارهەڵگری ئوردنی چوونەتە عێراقەوە

 

رۆژی یەکشەممە عەمار ئەبو رەجیع،  بەرپرسی گومرگی (تەریبیل) ئاشکرایکرد کە سەرەڕای ئەوەی ماوەی دوو مانگە بڕیاری ڕێگەپێدان بە هاتوچۆکردنی بارهەڵگرە ئوردنی و عێراقییەکان پەسەندکراوە، تەنیا 32 بارهەڵگری ئوردنی و 40 بارهەڵگری عێراقی هاتوچۆیان کردوە.


15. هازەلیەوم- عێراق هێڵی ئاسمانی بەغدا بۆ دیمەشق دەکاتەوە

رۆژی دووشەمە سەرچاوەیەکی عێراقی ئاشکرایکرد: هەوڵێکی زۆر دەدەن بۆ کردنەوەی هێڵێکی ئاسمانی راستەوخۆ لە نێوان بەغدا و سوریادا.


16. ئەفکار نیوز- پارێزگایەکی نوێ بونیاد دەنرێت

 

بەپێی پەرلەمانی ئێران پارێزگایەکی نوێ بەناوی (ئێسفەهانی باکور) بونیاد دەنرێت.

17- وه‌ن نیوس بۆكس: ئه‌ردۆغان به‌شداری مه‌راسیمی كردنه‌وه‌ی گه‌وره‌ترین مزگه‌وت ده‌كات 
 هه‌ینی رابوردوو ڕه‌جه‌ب ته‌یب ئه‌ردۆغان سه‌رۆكی توركیا به‌شداری له‌ مه‌راسیمی كردنه‌وه‌ی گه‌وره‌ترین مزگه‌وتی توركیا كرد، ئه‌ویش مزگه‌وتی (چاملیجه‌)یه‌ كه‌ له‌ شارى ئه‌سته‌نبوڵه‌ و له‌ ساڵی 2013 ده‌ستكراوه‌ به‌ دروستكردنى و 63 هه‌زار كه‌س له‌ خۆ ده‌گرێت و به‌ گه‌وره‌ترین مزگه‌وتی وڵاته‌كه‌ داده‌نرێت.

ئا: هێڤی فەرهاد

بڵاوکردنەوە: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure