كاردانەوەكان لەسەر هێرشكردنە سەر 4 كەشتی بارهەڵگری ئیمارات

هەواڵ / جیهان :: 13/05/2019‌ :: 1747‌ جار بینراوە

تاگ :: جیهان

دواڕۆژ، ئازوو محەمەد


وەزارەتی دەرەوەی ئیمارات رایدەگەنێت: (دوێنێ یەكشەممە 12ی ئایار)، لەنزیك بەندەری فوجەیرە هێرشكراوەتە سەر 4 كەشتی بارهەڵگەر بێئەوەی هیچ زیانی گیانی بەدواوە بێت.


وەزارەتی دەرەوەی ئیمارات دەشڵێت: "كەشتییەكان زیانیان هەبووە، بەڵام هیچ چەشنە سووتەمەنی یان مادەیەكی زیانبەخش نەچووەتە ناو ئاوەكە و هیچ كەسیش زیانی پێنەگەشتووە".

بەگوێرەی هەواڵی ئەو وەزارەتە، لێكۆڵینەوەكان دەستیانپێكردووە، بەڵام تائێستا هیچ شتێك ئاشكرا نەبووە.

حكومەتی سعودیەش لەسەر ئەو پرسە رایدەگەیەنێت: "دووان لەو كەشتییە بارهەڵگرانە سەر بەوڵاتەكەیان بووە و زیانی قورسیان بەركەوتووە".

بە وتەی خالد فاتح، وەزیری وزەی سعودیە، دوو كەشتی نەوت هەڵگریان لە ئاوەكانی دەریای عوماندا بووە كە كەوتوونەتە بەر ئامانجی ئەو هێرشە، بەڵام زیانی گیانی بەدواوە نەبووە.

وەزارەتی دەرەوەی ئێرانیش لە كاردانەوە بەرامبەر ئەو رووداوە، وێڕای ئیدانەكردنی، رایگەیاند: "ئەو كردەوەیە تەنیا بۆ تێكدانی ئاسایش ئەنجامدراوە و وڵاتانی ناوچەكە دەبێت هۆشیار بن و رێنەدەن ئەو چەشنە رووداوانە سەقامگیری ناوچەكە بشێوێنێت و هەورەهاش دەبێت هۆكاری ئەو رووداوە بە روونی ئاشكرا ببێت".

بەندەری فوجەیرە 1400 كیلۆمەتر لە ئاوەكانی گەرووی هورمزەوە دوورە كە شوێنی یەك لەسەر سێی بازرگانی جیهانی نەوت، لەو رێگە دەریاییەدایە.

 

پێداچوونەوە: ئارام غەفور 
بڵاوکردنەوە: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure