"لە 107 خانوی كەلەپوری سلێمانی 30 دانەیان ماون"

هەواڵ / کوردستان :: 09/05/2019‌ :: 192‌ جار بینراوە
دیمه‌نێك له‌ كۆنگره‌ رۆژنامه‌نوسیه‌كه‌ فۆتۆ: سایتى قایمقامیه‌ت

تاگ :: سلێمانی

دواڕۆژ، راپۆرتی پشتیوان جەمال

لەشاری سلێمانی لیژنەیەكی تایبەت بۆ پاراستنی شوێنەوار دروستكرا كە سەر بەلیژنە هاوبەشەكانی قایمقامیەتی سلێمانی دەبێت، بەپێی ئاماری بەڕێوەبەرایەتی شوێنەوار، لە 107 خانووی كەلەپوری شارەكە، 30 خانوویان ماون.


(ئەمڕۆ پێنجشه‌ممه‌ 9ى ئایارى 2019) لەقایمقامیەتی سلێمانی بەئامادەبوونی پارێزگاری سلێمانی و قایمقامی قەزای مەڵبەندی سلێمانی و بەرپرسی لایەنە پەیوەندیدارەكان و شوێنەوارناسان، لیژنەی پاراستنی شوێنەوار راگەیەندرا.

هەڤاڵ ئەبوبەكر، پارێزگاری سلێمانی لە كۆنگرەيەكی رۆژنامەوانیدا رایگەیاند: لیژنەی تایبەت بە پاراستنی شوێنەوار دروستكراوە كە تایبەتە بە پاراستنی ئەو خانووە كلتورییانەی لە ماستەرپلان جێگیركراون، لەمەودوا بەهەموو شێوەیەك دروستكردنی گەراج لەنێو سەنتەری شار قەدەغەیە، دەبێت شوێنی كەلەپوری و شوێنەواری بپارێزرێت و رێوشوێنی پێویست دەگرنەبەر.

وتيشى: رێكخراوی یونسكۆ هێنراونەتە سلێمانی و پشتگیرییان دەكەن بۆ ئەوەی بتوانن ئەو شوێنانە بخەنەسەر نەخشەی شوێنەوارە دێرینەكانی دنیا و رزگاریان بكەن لەڕووخان، بەهەماهەنگی چەند كەسایەتییەكیش لە بەریتانیا و زانكۆی ئەمەریكی لەسلێمانی خەریكن سلێمانی بكەنە شارێكی ئەدەبی لەسەر ئاستی جیهان.

هەر لە كۆنگرەكەدا ئاوات محەمەد، قایمقامی قەزای مەڵبەندی سلێمانی رایگەیاند: ئەو لیژنە نوێیە رۆژانە بەدواداچوون دەكەن بۆ بواری شوێنەواری كە مەرجەكانی شوێنەواریان تێدایە، بەو ئومێدەی بتوانن هاوكاریان بن، چونكە خزمەت بەبواری شوێنەواری شارەكە دەكەن.

كەمال رەشید، بەڕێوەبەری شوێنەواری سلێمانی لە لێدوانێكدا بۆ دواڕۆژ رایگەیاند: هەرچەندە دروستكردنی ئەو لیژنەیە درەنگە، بەڵام ئێستاش باشە و لەكاتی خۆیدایە، چونكە هیچ نەبێت با فریای ئەو تەلار و بینایانە بكەون تا نەهێڵن بڕوخێت، ئێستا لەكۆی 107 خانوو 30 خانووی كەلەپوری ماوەتەوە.

وەكو كەمال رەشید باسیكرد: پاراستنی ئەو شوێنە كەلەپورییانە دوو لایەنەیە، یەكێكیان بنەماڵەكان ئەگەر موڵكەكانیان بپارێزن بۆ ناوبانگی خۆیان باشە، لایەنی دووەمیش پەیوەندی بەحكومەتەوە هەیە، چونكە شوێنەوار بۆ پاراستنیان پێویستی بەپارەیە، تا پێش قەیرانی دارایی بەهۆی بوونی بودجە دۆخەكە باشبوو، بەڵام دوای قەیرانەكە بودجە نەما، ئێستاش حكومەتی هەرێم خەریكە بودجەیان بۆ دابیندەكەن بۆ پاراستنی ئەو خانوو و شوێنەوارانە.

لیژنەی شوێنەوار لەئێستاوە 14 خاڵیان وەكو راسپاردە پێشكەشی پارێزگار و قایمقامی سلێمانی كردووە بۆ پاراستنی شوێنەوارەكان.

رەوا كەریم، شوێنەوارناس و سەرۆكی لیژنەی شوێنەوار بە دواڕۆژی راگەیاند: لەگرنگترینی ئەو خاڵانە لەمەودوا رەزامەندی بۆ تێكدانی خانووی كەلەپور بەمەبەستی دروستكردنی گەراج نادرێت، ئەو گەراجانەشی مۆڵەتیان نییە لادەدرێت، دروستكردنی خانوو لەنێو گەڕەكی سەنتەری شار لەدوو نهۆم زیاتر رێگەی پێنادرێت، لەسەر شەقامەكانی سەنتەریش لە 3 نهۆم زیاتر رێگەی پێنادرێت، ئەو خانووانەشی دروستدەكرێن بەپێی رێنمایی لیژنەكە دەبێت، ئەو خانووانەشی رووخان و ئەگەر بودجە هەبێت دەیانەوێت وەكو خۆیان دروستیان بكەنەوە.

بڵاوکردنەوە: شيروان شەريف



  • ڕۆژ
  • هەفتە
  • مانگ
created by Avesta Group and powered by Microsoft Azure