تەرمی گەنجێک لە ماڵەکەی خۆیدا بە کوژراوی دۆزرایەوە

هەواڵ / کوردستانی :: پێش 1 هەفتە ‌ :: 3245‌ جار بینراوە

دواڕۆژ، عیماد جەباری
شەوی رابردوو تەرمی گەنجێک لە گەڕەکێکی کوردنشینی کەرکوک دۆزرایەوە، سەرچاوەیەکیش لە پۆلیسی شارەکە دەڵێت "لەلایەن ژنەکەیەوە کوژراوە".


سەرچاوەیەک لەبنکەی پۆلیسی ئازادی، شەوی پێنجشەممە 9ی ئاب بەدواڕۆژی وت "ئەمشەو تەرمی گەنجێک لەناو ماڵەکەی خۆیدا لەپشت سەنتەری رۆشنبیری گەڕەکی ئازادی شاری کەرکوک دۆزرایەوە".

وتیشی "گەنجەکە ناوی (محەمەد شێرکۆ)یەو تەمەنی 18 ساڵەو پێشمەرگەیە".

بەوتەی سەرچاوەکەی پۆلیس، دوای کاتژمێرێک لەڕووداوەکە لەلایەن ئاسایشی چەمچەماڵەوە ئاگادارکراونەتەوە کە لەبازگەی قەزاکە ژنێکیان دەستکیرکردووەو دەمانچەیەک و حەربەیەکی پێبووەو لەگەڵ دەستگیرکردنیشیدا دانی بەوەداناوە کە پیاوەکەی خۆی کوشتووەو هەڵاتووە، دوای بەدواداچوونیش دەرکەوتووە پەیوەندی بەڕووداوەکەی کەرکوکەوە هەیە.

سەرچاوەکەی پۆلیسی کەرکوک رەتیکردەوە هیچ لەبارەی هۆکاری تاوانەکەوە بزانن چونکە هێشتا ژنەکە لەلای ئاسایشی چەمچەماڵەو رادەستی کەرکوک نەکراوە، ئاشکراشیکرد کە ژنەکە ناوی (ف.ئ) و تەمەنی 18 ساڵە.

 

 



  • ڕۆژ
  • هەفتە
  • مانگ
created by Avesta Group and powered by Microsoft Azure