هه‌موو ده‌مان گه‌فێن قه‌یرانا گوشتى لسه‌ر دهۆك هه‌نه‌

هەواڵ / ئابوری :: پێش 1 هەفتە ‌ :: 225‌ جار بینراوە

دواڕۆژ، راپۆرتی بورهان یه‌حیا

پترییا به‌رهه‌مێ گوشتێ ناڤ بازاڕێن پارێزگه‌ها دهۆك ژ ده‌رڤه‌ى وه‌لاتى دهێت، ب گۆره‌ى گۆتنا رێڤه‌به‌رێ ڤێته‌رنه‌ریێ ل پارێزگه‌ها دهۆك: نێزیكى70% ژ ده‌رڤه‌ دهێت. رێڤه‌به‌رێ سامانێن ئاژه‌لى ل پارێزگه‌ها دهۆك ژى دیار دكه‌ت كو: مه‌هانه‌ ل سه‌رژێگه‌هێن تایبه‌ت 2500 گولكێن ناڤخۆ بۆ بازاڕى دهێنه‌ به‌رهه‌ڤكرن. هاوكات چاڤدێرییا بازرگانى ژى ل دهۆك دیار دكه‌ت بهایێ گوشتى ژلایێ وان ڤه‌ هاتینه‌ دیاركرن لێ دیاره‌ ژبه‌ر ئه‌رزانیێ، به‌شه‌ك ژ خه‌لكى ل موسل گوشتى دكرن. بازرگانه‌كێ گوشتى راگه‌هاند"ل هه‌موو جه‌ژن و هه‌لكه‌فتان قه‌یرانا گوشتى په‌یدا دبیت".


6 سه‌رژێگه‌هـ 2500 گولكان به‌رهه‌ڤ‌ دكه‌ن
رێدیر سدقى شه‌ریف رێڤه‌به‌رێ سامانێن ئاژه‌لى ل پارێزگه‌ها دهۆك بۆ دواڕۆژ راگه‌هاند"مه‌هانه‌ ل 6 سه‌رژێگه‌هێن مۆله‌ت دایى ل سنۆرێ پارێزگه‌ها دهۆك 2500 سه‌رێن گولكان دهێنه‌ سه‌رژێكرن و بۆ بازاڕێ ناڤخۆ دچیت، لێ ئه‌ڤ رێژه‌ تێرا پێدڤیێن بازاڕى ناكه‌ت له‌وا هه‌ر ب وى رێژه‌ى ئانكو 2500 گولك ژ ده‌رڤه‌ى وه‌لاتى دهێنه‌ ناڤ هه‌رێمێ و پشتى پشكنینێن تایبه‌ت دهێنه‌ سه‌رژێكرن".

نێزیكى 70% ژ به‌رهه‌مێ بازاڕى ژ ده‌رڤه‌ى وه‌لاتى دهێت
سه‌رژێگه‌هێن ئاژه‌لان لژێڕ چاڤدێرییا توند دانه‌. سه‌ر ڤى بابه‌تى، دكتۆر مێهڤان ئه‌حمه‌د رێڤه‌به‌رێ ڤێته‌رنه‌ریێ ل پارێزگه‌ها دهۆك بۆ دواڕۆژ خویاكر: "ل ده‌ڤه‌رێن وه‌كو زاخۆ، خانكێ، قه‌سرۆك، ئاكرێ، به‌رده‌ره‌ش و ئامێدیێ، سه‌رژێگه‌هێن فه‌رمى و مۆله‌تى دایى ب گۆره‌ى پیڤه‌رێن ساخله‌میێ هه‌نه‌ و رێڤه‌به‌رییا ساخله‌مییا پارێزگه‌ها دهۆك ب رێیا نۆژدار و بسپۆران چاڤدێرییا وان دكه‌ت لێ ب گۆره‌ى داتایێن به‌رده‌ست نێزیكى 70% ژ به‌رهه‌مێ بازاڕى ژ ده‌رڤه‌ى وه‌لاتى دهێت".

ژ سووریێ گوشت دهێته‌ شنگال پاشى بۆ موسل
ئه‌گه‌ر چنه‌ به‌شه‌ك ژ وه‌لاتیێن دهۆك گوشتێ سۆر ل موسل دكرن؟ بۆ به‌رسڤا ڤێ پرسیارێ، رێڤه‌به‌رێ سامانێن ئاژه‌لى ل پارێزگه‌ها دهۆك گۆت: "چ پێزانین ل سه‌ر ڤى بابه‌تى به‌رده‌ست نینن لێ دوور نینه‌ ژ سووریێ و ب رێیا شنگال ئه‌و ئاژه‌ل دگه‌هنه‌ موسل لێ پترییا مه‌هان ب سه‌دان ئاژه‌لێ به‌رهه‌مێ دهۆك بۆ بازاڕێن موسل و پارێزگه‌هێن دى دچن".

چاڤدێرییا بازرگانى بهاى ل سه‌ر گوشتى ددانیت
رێكخستنا بهاى و ئه‌رزانى فاكته‌رێن سه‌ره‌كى بۆ په‌یداكرنا بازاڕه‌كێ باشن بۆ ئاژه‌لێ ناڤخۆ. ل سه‌ر ڤێ پرسێ شوكرى شه‌فیق به‌رپرسێ راگه‌هاندنا رێڤه‌به‌رییا چاڤدێرییا بازرگانى ل پارێزگه‌ها دهۆك بۆ دواڕۆژ دیاركر: "ل بازاڕێ گوشتفرۆشان هه‌موو بها ژلایێ چاڤدێرییا بازرگانى ڤه‌ هاتینه‌ ده‌ستنیشانكرن و پێگێرییه‌كا ته‌مام پێ دهێته‌كرن و پترییا جاران گوشتفرۆش كێمتر ژ وى بهایێ مه‌ بۆ ده‌ستنیشانكرى دفرۆشن".

سه‌باره‌ت چۆنا وه‌لاتییان بۆ موسل ب مه‌ره‌ما كرینا گوشتى، شوكرى شه‌فیق دیاركر: "ب شێوه‌یه‌كێ گشتى و ب گۆره‌ى سه‌ربۆرێن مه‌، خه‌لكێ پارێزگه‌ها دهۆك پتر حه‌ز ل سه‌ر بهایێ كێم هه‌یه‌ هه‌تاكو كوالێتیێ، له‌وا ئه‌گه‌ر ل جهه‌كى گوشت ب هایه‌كێ ئه‌رزانتر بهێته‌ فرۆتن و ئه‌گه‌ر كوالێتییا وێ ژى باش نه‌بیت دێ قه‌ست كه‌نێ".

دهۆك مه‌هانه‌ پێدڤى ب 5000 سه‌رێن گولكانه‌
رێڤه‌به‌رێ ڤێته‌رنه‌رییا پارێزگه‌ها دهۆك، پێشتر بۆ دواڕۆژ دیاركربوو: "وه‌زاره‌تا چاندنێ هینانا گۆلكان و چێلان بۆ په‌یداكرنا گۆشتێ سۆر لدووڤ رێژه‌یا روونشتڤانێن پارێزگه‌هان دیاردكه‌ت، مه‌هانه‌، بۆ دهۆك ژى هینانا 5000 هزار سه‌رێن گولكان دیاركرینه‌. بازرگانێن دهۆك هه‌موو مه‌هان 5000 هزار گۆلكان ناهینن دهۆك، چنكو ل وه‌رزێ زڤستانێ خواست لسه‌ر گوشتى كێمتره‌ ژ وه‌رزێن دى، لێ وه‌رزێ بوهارێ هینانا گۆلكان دگه‌هیته‌ 5000 سه‌ران". 

به‌رهه‌مێ گوشتێ سۆرێ ناڤخۆیى ل دهۆك پترى 8000 ته‌نانه‌
پێشتر رێڤه‌به‌رێ سامانێن ئه‌ژه‌لى ل دهۆك، بۆ دواڕۆژ راگه‌هاندبوو: "به‌رهه‌مێ گوشتێ سۆر یێ ناڤخۆ‌یی دهۆك سالانه‌ دناڤبه‌را 8300-8400 ته‌نان دایه‌ و ئه‌ڤ به‌رهه‌مه‌ بتنێ تێرا 50% ژ روونشتڤانێن دهۆك دكه‌ت". 

ل جه‌ژن و هه‌لكه‌فتان قه‌یرانا گوشتى په‌یدا دبیت
سه‌باره‌ت بهایێن گوشتى ژى، ئه‌یاد سه‌میر ژ بازاڕێ گوشتفرۆشان ل سه‌نته‌رێ باژێڕێ دهۆك، گۆت: "نه‌رمى ب گوێره‌ى جۆراتیێ ژ 10 هزار هه‌تا 15 هزاران دهێته‌ فرۆتن و پراسى ژى ناڤبه‌را 6 هزار هه‌تا 10 هزار دینارایه‌".

ئه‌یاد سه‌میر دیاركر: "ئه‌گه‌ر ئاژه‌له‌ك ژ ده‌رڤه‌ى وه‌لاتى بهێته‌ ناڤ هه‌رێمێ دیسا ل ڤێره‌ دهێته‌ خودانكرن و مه‌زنكرن و ل ژێڕ چاڤدێرییا رێڤه‌به‌رییا ڤێته‌رنه‌ریێ دایه‌، لێ ب شێوه‌یه‌كێ به‌رده‌وام هه‌ر ده‌ما دبیته‌ هه‌لكه‌فته‌كا جڤاكى و جه‌ژنه‌ك ئێكسه‌ر قه‌یرانا گوشتى ل ناڤ بازاڕێن دهۆك سه‌رهه‌لدده‌ت".

پ: ل. م



created by Avesta Group and powered by Microsoft Azure