نۆ ساڵە یاسایەك دەرچووە و جێبەجێ نەكراوە

هەواڵ / کوردستان :: پێش 1 هەفتە ‌ :: 174‌ جار بینراوە

دواڕۆژ، پشتیوان جەمال

نۆ ساڵە پەرلەمانی كوردستان یاسای پاراستنی مافی بەكاربەری پەسەندكردووە، بەڵام تائێستا نەچووەتە بواری جێبەجێكردنەوە.

پاشنیوەڕۆی ئەمڕۆ (11ی ئەیلولی 2019) لە رێكخراوی گەشەپێدانی ئابوری (كیدۆ) بەئامادەبوونی چەند پسپۆر و شارەزایەكی ئابوری، سیمینارێك بۆ چۆنیەتی جێبەجێكردنی یاسای مافی بەكاربەر بەڕێوەچوو.

حیسام بەرزنجی، سەرۆكی رێكخراوی گەشەپێدانی ئابوری بەدواڕۆژی راگەیاند: سیمیناری ئەمڕۆیان هەوڵدانە بۆ جێبەجێكردنی ئەو یاسایە، چونكە ئەو كاتە مافەكانی بەكاربەر پارێزراوتر دەبن لە ڕووی خۆراك و دەرمان و كاڵا، بۆئەوەش دەبێت دەستەیەكی باڵا لەئاستی وەزارەتەكان دروست بكرێت بۆ چاودێری خۆراك و كاڵا.

هەروەها عەتا محەمەد، جێگری سەرۆكی یەكێتی هاوردە و ناردنكارانی كوردستان بۆ دواڕۆژی روونكردەوە: ئەوان بەردەوام داوای جێبەجێكردنی ئەو یاسایەیان كردووە، بەڵام كە جێبەجێ نەكراوە كەمتەرخەمییە، چونكە بە جێبەجێنەكردنی بەرژەوەندی كۆمەڵێك خەڵكی تێدایە، بۆیە وایانكردووە یاساكە جێبەجێ نەكرێت.

ناوبراو پێیوانییە بازرگانان كاڵای خراپ هاوردەی كوردستان بكەن و وتی :"بازرگان ئەگەر بەمانای وشە بازرگان بێت كاڵای خراپ ناهێنن، بەڵام كۆمەڵە كەسێكن قاچاخچین و بەنایاسایی كاڵا دەهێنن، ئێستا كۆمپانیایەك لەدەروازەكان دانراوە بۆ چاودێری كاڵاكان، بە بازرگانیشمان راگەیاندووە كە نابێت كاڵای خراپ بێنن".

پ: ک. س



created by Avesta Group and powered by Microsoft Azure