بەڕێوەبەری گشتی پەروەردەی سلێمانی لە پۆستەكەی لادرا

هەواڵ / کوردستان :: 6 رۆژ پێش ئێستا‌ :: 3904‌ جار بینراوە
دڵشاد عومەر

تاگ :: پەروەردە

دواڕۆژ، پشتیوان جەمال

بەڕێوەبەری گشتی پەروەردەی سلێمانی بەبڕیاری جێگری سەرۆکی حکومەتی هەرێم لەپۆستەكەی لادرا.


سەرچاوەیەكی ئاگادار لە پەروەردەی سلێمانی (ئەمڕۆ پێنجشەممە 11ی تەمموزی 2019) بە دواڕۆژی راگەیاند: بە بڕیاری قوباد تاڵەبانی، جێگری سەرۆكی حكومەتی هەرێمی كوردستان و لەلایەن پشتیوان سادق، وەزیری پێشووی پەروەردەوە بڕیاری لادانی دڵشاد عومەر، بەڕێوەبەری گشتی پەروەردەی سلێمانی دراوە، بەڵام تائێستا ناوبراو دەستلەكارترازانی نەكردووە.

سەبارەت بەهۆكاری لابردنەكەی، ئەو سەرچاوەیە وتی :"مامۆستا دڵشاد ماوەی چوار ساڵی لەپۆستەكەی تەواوكردووە، بەڵام هەندێك تێڕوانینی یەكێتی و گۆڕان لەبواری پەروەردەیی هەبوو، بۆ نموونە ماوەی پێشوو بەڕێوەبەری پەروەردەی دەربەندیخان دانرا، بەڵام مامۆستا دڵشاد دژی بووە و رازی نەبوو بە دانانی".

بەوتەی ئەو سەرچاوەیە تا كاتی جێگرتنەوەی بەڕێوەبەری گشتی پەروەردە، جێگرەكەی بەوەكالەت كارەكانی بەڕێوەدەبات.

هاوكات بەرزان شێخ محەمەد، جێگری سەرۆكی ئەنجومەنی پارێزگای سلێمانی لە پشكی گۆڕان بەدواڕۆژی راگەیاند: "هۆكاری لادانی دڵشاد عومەر تەنیا پەیوەندی بەدانانی بەڕێوەبەری پەروەردەی دەربەندیخانەوە هەیە كە بەڕێوەبەری گشتی ئاگای لێ نەبووە و فەرمانەكەشی جێبەجێ نەكردووە، ئەوەش هەقی خۆی بووە، چونكە ئسوڵ وایە لە بەڕێوەبەرایەتی گشتییەوە ناوی ئەو بەڕێوەبەرە بۆ وەزارەت بەرزبكرێتەوە، بەڵام لەلایەن وەزارەتەوە ئەو بەڕێوەبەرە دانراوە".

ناوبراو روونیكردەوە: لەبەر ئەوەی دڵشاد عومەر لەلایەن ئەنجومەنی پارێزگاوە متمانەی پێبەخشراوە، بۆیە ئەوانیش بەدواداچوون بۆ لابردنەكەی دەكەن.

دڵشاد عومەر، لەهاوینی 2015ەوە لەپشكی بزووتنەوەی گۆڕان پۆستی بەڕێوەبەری گشتی پەروەردەی سلێمانی وەرگرتووە.  

پێداچوونەوە: ئیحسانی مەلا فوئاد
بڵاوكردنه‌وه‌: شیروان شه‌ریف



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە