دوو كۆشكی سپی و شووشەیی

بۆچوون / بیروڕا :: پێش 2 هەفتە

سەرچاوە: ئەلسەباح
وەرگێڕان: لوقمان محەمەد رەشید

لەیەكەم رۆژی ئەم ساڵی 2017 یەدا، بان كی مۆن وەزیفەكەی خۆیی وەك ئەمینداری گشتیی نەتەوەیەكگرتووەكان لەدەستدا، دوای گرێیەك كە تێیدا (تێربوو) لە نیگەرانی و دڵەڕاوكێی لەبەرامبەر بەڵا و كارەساتەكانی جیهاندا. كە دەڵێم وەزیفەكەی لەدەستدا، لەبەر ئەوە نا كە كودەتایەك لە كۆشكە شووشەییەكەدا ئەنجامدرابێت، بەتایبەت لە خولی سی و هەشتەمین-یدا، ئەو كۆشكەی كە نووسینگەكەی ئەمینداری گشتیی تێدابوو، بەڵكو مەبەستم لێوەرگرتن و خواستنە لەو گوزارشتەی كە خۆی كردی و بە زمانی ئینگلیزی لەبەردەم كۆمەڵێك لە فەرمانبەرانی نەتەوەیەكگرتووەكاندا،  ئەوەبوو لە شەوی سی و یەكی مانگی كانونی یەكەمی ساڵی 2016 دا وتی (lost my job). وتیشی لە سبەینێ بەدواوە وەك (سەندرێلا) دەبێت، ئەمەیش وەك گوزارشتێك لەوەی كە ئازادیی خۆیی بەدەستهێناوەتەوە. ئیتر ئەنتۆنیۆ گۆتێرس-ی پرتوگالی جێگەی دەگرێتەوە. 
هەر دوای نزیكەی سێ‌ هەفتەیەكیش لە خانەنشینبوونی مۆن و چوونی گۆتێرس بۆ ناو كۆشكە شووشەییەكە بۆ ماوەی پێنج ساڵی داهاتوو كە بۆی هەیە نوێیش بكرێتەوە بۆ پێنج ساڵی دیكە، كەسێكی تازەیش دەچێتە كۆشكی سپی-یەوە و تێدا دادەنیشێت ئەویش دۆناڵد ترەمپ-ی ملیاردێرە، ئەمیشیان بۆ ماوەی چوار ساڵ كە بۆی هەیە بۆ چوارساڵ تازە بكرێتەوە.

كەواتە ئێستا ئێمە لەبەردەم هاوكێشەی دەسەڵاتێكی نێودەوڵەتیداین كە بۆ دە ساڵ درێژدەبێتەوە هەروەها دەسەڵاتی دەوڵەتێكیش كە نفوزی كیشوەربڕە، بۆ ماوەی هەشت ساڵ، كە بەگوێرەی دەستووری ویلایەتە یەكگرتووەكان رێگەنادرێت بە درێژكردنەوە لە ئەمریكا بۆ زیاتر لە دوو خول و ئەوەی نەتەوەیەكگرتووەكانیش بەپێی یاساكانی رێكخراوەكە، رێگە بە دە ساڵ زیاتر مانەوەی سكرتێرە گشتیەكەی نادات.
مەسەلەكە چوار ساڵی بێ‌ درێژكردنەوە بۆ ترەمپ یاخود پێنج ساڵی بێ‌ درێژكردنەوە بۆ گۆتێرس بێت، زۆر شت هەن كە دەتوانین لەسەر ئاستی چۆنیەتی وێناكردنی جیهان بیڵێین لە ماوەی ئەم چوار و پێنج ساڵەی داهاتوودا و لە سایەی وەرچەرخانە گەورەكان لە هەموو ئاست و بوارەكاندا.  رەنگە دیارترین سیمایەك كە دە ساڵی یەكەمینی سەدەی بیست و یەكی پێ‌ جیابكرێتەوە، بریتی بێت لە زۆریی ململانێ‌ ئیقلیمی و نێودەوڵەتیەكان و هەڕەشەكان و مەترسیەكان و لەوانەیشە لەپێش هەموویانەوە ئاڵنگاریەكانی تیرۆر (رێكخراوی داعش) بێت كە میراتگری شەرعیی ئەلقاعیدەیە، هەروەها قەیرانی ئابوری و داڕمانی نرخی نەوت و ئەو گۆڕانكاریانەی كە لێیانەوە سەرچاوەیان گرتووە و بوونە هۆی ئەوەی ئاشتی ببێتە كاری لەپێشینە لە جیهاندا، بەتایبەت لە بەشە خۆرئاواییەكەیدا.

هەرچەندە ئاڵنگاریەكان لەوەدەچن كە تا ئاستێكی زۆر بەیەكداچوو و ئاڵۆسكاو بن، چونكە گەشەكردنی دیاردەی تیرۆر كە سەدەی بیست و یەك-ی بە هێرشەكانی یازدەی ئەیلولی ساڵی 2001 ی نیویۆرك-ی ویلایەتە یەكگرتووەكان كردەوە و بە دەركەوتن و لەدایكبوونێكی تازە (داعش) لە ئەلقاعیدەی دایكەوە سەدەكە كۆتایهات، كە رێژەی رقلێبوونەوەی لە موسڵمانان لە جیهاندا بەرزكردەوە، بەڵام لە هەمانكاتیشدا بووە هۆی گەورەترین كۆچ بەرەو ئەو دەوڵەتانەی كە پێیان دەوترێت دەوڵەتە كافرەكان، بەتایبەت ئەوروپا و ویلایەتە یەكگرتووەكان. هاوشانی گەشەسەندنی دیاردەی تیرۆر، هەرەسی نرخی نەوتیشی هاتەسەر بۆ ئەوەی نەخشەیەكی تازە لە خۆرئاوادا ئاماژە پێبدات كە سەرەنجام بووە هۆی دەرچوونی بریتانیا لە یەكێتی ئەوروپا و دەركەوتنی جاماوەرێتیی راستڕەوی توندڕەو لە خۆرئاوا كە گەیشتنی ترەمپ بە كۆشكی سپی یەكێك لە دەرهاویشتەكانیەتی. 
 
بە هاوتەریبی لەگەڵ داكشانی نرخی نەوت و هەڵكشانی هێزی گەورەی ئیقلیمی (ئێران بۆ نموونە) لە ناوچەكەدا، گۆڕانكاری و وەرچەرخانی دیكەیش لەم ناوچەیەدا سەرهەڵدەدەن و دەرەنجامی زۆرتریان لێدەكەوێتەوە. ئەمانەیش بەهۆی كارە لەپێشینەكانی ترەمپ-ەوە دەبن و كارێكی وا بە گۆتێرس دەكەن كە نەك هەر كاتی ئەوەی نەبێت تێیدا نیگەران بێت، بەڵكو رەنگە وای لێبێت نەتوانێت سەری خۆیشی بخورێنێت.


created by Avesta Group and powered by Microsoft Azure