پاڵاوگەی بێجی چی لێهات؟!

بۆچوون / بیروڕا :: 01/12/2016

سەرچاوە: ئەلمەدا
وەرگێڕان: لوقمان محەمەد رەشید


خوێنەری ئازیز، تكات لێدەكەم وەرە لەگەڵمدا ئەم نهێنیە بدۆزینەوە و ئەم مەتەڵە هەڵبێنین:"لە پاڵاوگەی بێجی چی روودەدات؟". بۆیەیش داوای یارمەتیت لێدەكەم چونكە خۆم چەند رۆژێكە هەوڵی بۆ دەدەم بەڵام بێ‌ سوودە و هیچ ئومێدێكم دەستنەكەوت. پێش دوو هەفتەیەك لەمەوبەر وەزیری نەوت هات و لە كەناڵەكانی راگەیاندنەوە پێیوتین "وەزارەت سوورە لەسەر ئەوەی پەلەبكرێت لە دووبارە ئامادەكردنەوەی پاڵاوگەكە بە نوێترین خەسڵەت و شێوازە تەكنیكیە جیهانییەكان". رەنگە هەندێك بڵێن، ئەرێ‌ تۆ چیت لەمەداوە، ئێمە لە وڵاتێكدا دەژیین كە وشەگەلی دەستكەوتەكان و پرۆژەكانی بەدەستە (بەجوملە) تێدا دابەشدەكرێت! لەگەڵ ئەوەیشدا كارگەیەك نادۆزیتەوە كار بكات یان پرۆژەیەكی باشی وەبەرهێنان نابینیت و رێژەی بێكارییش تێیدا لەسەرووی سودان-ی (دەستەخوشك)یەوەیەتی!.
وڵاتێك هەموو رۆژێك بەرپرسەكانی باس لە دواڕۆژێكی پرشنگدار و ئەو تاوەرانە دەكەن كە لە پایتەختەكەیدا بڵند دەبنەوە، كەچی لە جیاتی ئەوە تەپۆلكەی پاشماوە و خاشاكی تێدا بەرزدەبێتەوە و رێژەی هەژاری و نەخوێندەواریی تێدا زیاد دەبێت. چۆن؟ ئەم پرسیارەیش هیوادارم هاوكاریم بكەن بۆ ئەوەی وەڵامێكی قەناعەتپێهێنیم دەستكەوێت. لەبەر ئەمە من داوێنگیرتان دەبم كە هەوڵبدەن وەڵامێكی پاڵاوتگەی بێجی-م بدەنەوە دوای ئەوەی ئەو گرتە كورتە ڤیدیۆییەی مشعان ئەلجبوری-ی پارلەمانتارتان بینی كە پێش چەند رۆژێك بڵاویكردەوە و زۆر بەراشكاوی پێماندەڵێت كە دامەزراوەی پاڵاوگەی بێجی هیچی تێدا نەماوە تەنیا لە سەدا 15 ی نەبێت!. ئاخر چۆن گەورەم؟ ئەی چی دەربارەی لێدوانەكەی وەزیری نەوت؟. مشعان وەڵامت دەداتەوە كە پاڵاوگەكە دوای ئەوەی لە داعش رزگاركرا، رێژەی ئەو ئامێرانەی كە كاریان دەكردن و تێكنەچووبون لە ژوور 80% وە بوون. لێرەدا دەپرسم: پاڵاوگەكە چۆن و بۆ كوێ‌ چوو؟ چونكە هەر بەڕاستی من نازانم و تێیناگەم. منیش وەك ئێوە سەرمسوڕماوە و وەك مشعان ئەلجبوری-یش ناوێرم راستیەكە بلێم!.  دەیشزانم لە وڵاتێكدا دەژیین كە تێیدا یاسا بە پێوەری سەرانی وڵاتەكە داڕێژراوە، بەڵگەی ئەمەیشم ئەوەیە كە نوری ئەلمالیكی فەخامەتی جێگری سەركۆمار هەموو هەفتەیەك سكاڵایەكی یاساییم لەسەر تۆمار دەكات.
دوای 4/9/2003 راگەیاندن و هەموو رایگشتیی جیهانی سەرقاڵی زاراوەی (الحواسم-دزەكان) بوو، ئەوكاتە گەلی پەست و برسی وێڵ بوو بەدوای هەر رێگەیەكدا بۆ ئەوەی تووڕەیی خۆی بەتاڵ بكاتەوە دژی زوڵم و ستەم و نەداری، هەندێك لە نووسەران و شیكەرەوەكانیش سەرقاڵ بوون بەو دیمەنە رووكەشانەوە كە ئەوسا روویاندا و ئاگایان لەوەنەبوو كە بەڕێز بریمەر دەسەڵاتداری مەدەنی شانۆكەی ئامادەدەكرد بۆ سەردەمی راستەقینەی دزەكان، ئەو سەردەمەی سیاسەتمەدارانێك سەركردایەتیان كرد كە وڵاتی كردە كێڵگەیەكی تایبەت كە  خێروبێرەكەی بڕوات بۆ خراپترین رۆڵەكانی.
خۆ ئەگەر من هاووڵاتیی وڵاتێكی دیكەی جیهان بوومایە و گوێم لە قسەی سیاسیە عێراقیەكان بوایە، بڕیارم دەدا بچمە خەڵوەتەوە. بەڵام عێراقیم و گوێم لێدەبێت كە یاسای پاراستنی ژنانی عێراقی لە توندوتیژیی خێزان و كۆمەڵگە، لە پارلەماندا پەكخراوە چونكە پارتە دینییەكان نایانەوێت پەسەند بكرێت، كارەساتەكە لەوەدایە كە ژنە پارلەمانتارەكانی هاوپەیمانیی (چاكسازییەكان) یەكەم كەسانێك بوون كە رازیی نەبوون دەنگ لەسەر یاساكە بدرێت!.

created by Avesta Group and powered by Microsoft Azure