تكایە.. پەیكەرەكەی جەواهیری شەرمەزارمان دەكات

بۆچوون / بیروڕا :: 19/10/2016

سەرچاوە: ئەلمەدا
وەرگێڕان: لوقمان محەمەد رەشید

لە زۆربەی پایتەختەكانی جیهاندا پەیكەری سیمبولەكانیان لە گۆڕەپانە گشتیەكاندا، وەك رێزێك لە خاوەنەكانیان، دادەنرێت. ئەم سیمبولەیشە كە درەوشاوەیی بۆ نیشتمان دەگێڕێتەوە و جەنگەكانی لە دژی ستەم و چەوساندنەوە پێ‌ دەباتەوە، حكومەتەكان دەڕۆن و ئەم پەیكەرانە وەك شایەتێك لەسەر مێژوویان دەمێننەوە. ئەوەتا لە پاریس تا ئێستایش ڤۆڵتێر ساڵانی دەمارگیری و لێبووردەییان بیردێنێتەوە. لە بەرلین-یش ماركس بەسەرسوڕمانەوە دانیشتووە و لەوە دەڕوانێت كە چۆن سەرمایەداریی توانیویەتی وا بكات هەموو ئەو كەسانەی لەسەر خاكەكەیین بكاتە هاونیشتمانیی یەكسان لە ماف و ئەركەكانیاندا. كەچی لەندەن لە باو دەرچووە و پارلەمانەكەی مكوڕ بووە لەسەر ئەوەی كە پەیكەرێكی مەهاتما غاندی لە گۆڕەپانە سەرەكیەكەیدا دابنێت و دەیڤید كامیرۆن-ی سەرەك وەزیرانی ئەوسای بریتانیایش پێمان بڵێت "ئەم سەركردە هیندی-یە، تا ئێستایش سەرچاوەی گەورەی سروش و هێزە بۆمان". هیوادارم لە كاتێكدا كە تۆیش لە خوێندنەوەی ئەم هەواڵە دەبیتەوە ئەوەیش بزانیت كە خاوەنی ئەم پەیكەرە (واتا غاندی) سەركردایەتیی گەورەترین شۆڕشی لە جیهاندا كردووە لە دژی ئیستیعماری بریتانی و لەسایەی ئەویشدا هندستان لە ساڵی 1947 دا سەربەخۆیی بەدەستهێنا.
ئێمەیش بەو هیوایەبووین كە دوای ئەوەی سەركردە (شۆڕشگێڕەكان) بەغدا-یان وەرگرت، بە باشی درك بەوە بكەن كە رێگەی گۆڕانكاریی بە سووربوون و كۆڵنەدان و كاركردنی سیمبولەكانی ئەم وڵاتە، تەختكراوە، لە نموونەكانی جەواهیری و غائب توعمە فەرمان و ئەبو گاتع و جواد سەلیم و حەقی شبلی كە خەونیان بە عێراقێكی پێشكەوتووەوە دەبینی.   
ئەمڕۆ هەركاتێك دەبینین وڵاتانی جیهان رێز لە سیمبولەكانی خۆیان دەنێن، ئێمەیش ئەو سەدان پیاو و ژن و منداڵانەمان بیردەكەونەوە كە ناونیشانی رۆژی نیشتمانی-یان بۆ  عێراق نووسیەوە. ئەوسا منیش وەك زۆربەی خەڵكەكە، ئەو رۆژە وامدەزانی كە سیاسیەكانی عێراق ناوەندێكی گەورە دەكەنەوە و روفاتی هەموو ئەوانەی تێدا كۆدەكەنەوە كە لە غەریبیدا مردن و خەونیان بە عێراقێكی ئارام و سەقامگیرەوە دەبینی، بەڵام بەداخەوەم، هەرچەندە پەیكەرەكەی حەقی شبلی-م دەبینی لە نزیك شانۆی نیشتمانی و پێش ئەویش پەیكەرەكەی جواد سەلیم و ئەمڕۆیش پەیكەری جەواهیری لە دەروازەی یەكێتی ئەدیبان، لە چاوانی عێراقیەكاندا نیشانەكانی سەرسامی و داخ دەردەكەون، چونكە ئەم پەیكەرانە تووشی شەرمەزاریمان دەكەن و وا هەست دەكەین قەسیدەكانی جەواهیری گەشتێكی راگوزەری ژیانی عێراقیەكان بووە. بەڕێزان بەداخەوە، بەمە هەست بە شەرمەزاریی دەكەین، بەم پەیكەرانە كە سیمبولەكانی عێراق بچوك دەكەنەوە و گاڵتەیان پێدەكەن، چونكە جەواهیری-یەكی باڵا بەرز ون دەبێت و لەبری ئەوەی پەیكەرێكی بە قەبارەی شیعر و هەڵوێستەكانی بۆ دابنێین و شایەت بێت لەسەر مێژووەكەی، تەنیا بارستەیەك بەردی كەڵەكەبوو دادەنێین و بەس!.
كاتێك تەرمی نووسەری بەناوبانگی روس، ئەلكسەندەر سۆڵژنستین-یان بردە یەكێك لە هۆڵەكانی كرملین-ەوە بۆ ئەوەی هەزاران روس دوا ماڵئاوایی لێ‌ بكەن، بەناوبانگترینی ئەو كەسانەی كە سڵاویان لێكرد ڤلادیمێر پوتین بوو. سیمبولەكانی وڵات بابەتی جیاوازی و ناكۆكیی نین چونكە ئەوان گرنگترین بەشی شكۆ و سەروەریی گەل و وڵاتەكانن.
 ئێمەیش ئومێدەواربووین سەركۆمار ببینین لە ناشتنی هونەرمەندی گەل یوسف ئەلعانی-دا و بیبینین دوا سڵاو لەو پیاوە بكات كە لەپێش پارتە سیاسیەكاندا لەدایكبووە و لە منداڵدانی ململانێی پارتەكانەوە نەهاتووە، بەڵكو تەنیا لە منداڵدانی عێراقەوە لەدایكبووە. 

created by Avesta Group and powered by Microsoft Azure