پەروێزخان: ئاڵوگۆڕی بازرگانی كەمبوەتەوە و داهات زیادیكردوە

هەواڵ / ئابوری :: پێش 1 هەفتە ‌ :: 217‌ جار بینراوە

دواڕۆژ، هەردی عوسمان
بەڕێوەبەرایەتی دەروازەی نێودەوڵەتی پەروێزخان ئاماری ئاڵوگۆڕی بازرگانی لە مەرزەكە ئاشكراكرد و بەجیاواز لە ساڵی 2015 ئاڵوگۆڕی بازرگانی لەساڵی 2016دا كەمیكردوە، بەڕێوەبەری گومركیش ئاشكرایدەكات كە داهات زیادیكردوە.


عەلی تۆفیق، بەڕێوەبەری دەروازەی نێودەوڵەتی پەروێزخان، لە كۆنگرەیەكی ڕۆژنامەوانیدا ڕایگەیاند "بەپێی ئەو ئامارەی لە بەردەستماندایە لەماوەی ساڵی 2016دا  169هەزار و 83 ئۆتۆمبێلی بارهەڵگر و ئۆتۆمبێلی تایبەتی و تانكەر بەمەرزەكەدا تێپەڕیون و هاتوون كە 1319 ئۆتۆمبێلیان بەهۆی دەرنەچونیان لە پشكنین گەڕاونەتەوە بۆ وڵاتی ئێران".

وتیشی "بەڵام لە ساڵی 2015دا ڕیِژەكە بەرزترە بەجۆرێك لەو ساڵەدا 197هەزار و 752 ئۆتۆمبێل هاتونەتە مەرزەكەوە، بەڵام لەساڵی 2016دا ڕێژەكە كەمیكردوە بۆ  151هەزار و 533 بار ، بەم پێیەش 46 هەزار و  219 بار كەمیكردوە".

سەبارەت بەو ئۆتۆمبێلانەش کە لە هەرێمەوە چونەتە ئێران، عەلی تۆفیق ئاماژەی بەوەدا "لەساڵی 2015دا  5 هەزار و 57 ئۆتۆمبێل بووە، بەڵام لە ساڵی 2016دا 2246 ئۆتۆمبێل بوە".

سەبارەت بەگەشتوگوزاریش بەڕێوەبەری دەروازەكە وتی "لە مەرزی پەروێزخان لەساڵی 2015دا هەزار و 809 ئۆتۆمبێل بوە و لەساڵی 2016دا كەمیكردوە بۆ 1448 ئۆتۆمبێل، هەروەك لە ساڵی 2015دا 704 ئۆتۆمبێل چونەتە ئێران و لە ساڵی 2016دا بونەتە 385ئۆتۆمبێل".

بەپێی ئامارەكانی ساڵی 2015ی مەرزی نێودەوڵەتی پەروێزخان لەو ساڵەدا 61 ملیار و 669 ملیۆن دینار داهاتی مەرزەكە بووە، بەڵام بەپێی وتەی بەڕێوەبەری گومرگی گەرمیان بۆ ساڵی 2016 داهاتەكە زیاترە لەو ڕێژەیە.

حسێن ئەحمەد، بەڕێوەبەری گومرگی گەرمیان لە كۆنگرە ڕۆژنامەوانییەكەدا ڕایگەیاند "ناتوانین هیچ ڕێژەیەك سەبارەت بە داهاتی ساڵی 2016 بۆ كەناڵەكانی ڕاگەیاندن ئاشكرابكەین، بەڵام ڕێژەی داهاتەكە دەتوانین بڵێین ڕووی لە زیادبوون كردوە بەڵام بەڕێژەیەكی زۆرنییە".

سەبارەت بە هۆكاری زیادبوونی داهاتەكە بەپێی وتەی عەلی تۆفیق بەڕێوەبەری مەرزی پەروێزخان وتی "هۆكاری ئەوە پەیوەندی بەو داهاتەوە هەبووە كە بەهۆی ڕێگەگرتن لەهاتنی بارەكانی سەوزەوە لە باشماخەوە تەواوی ئەو بارانە لەمەرزەكەی ئێمەوە هاتوون بە گومرگێكی بەرزەوە، زیادبونی داهاتەكەش پەیوەندی بەوەوە هەبووە".

مەرزی نێودەوڵەتی پەروێزخان دەكەوێتە سنوری ئیدارەی گەرمیانەوە و بەیەكێك لە مەرزە نێودەوڵەتییەكانی نێوان ئێران و هەرێم دادەنرێت كە لە ساڵانی ڕابردودا لەسەر ئاستی عێراق ئەو مەرزە زۆرترین ئاڵوگۆڕی بازرگانی تیادا كراوە.


  • ڕۆژ
  • هەفتە
  • مانگ
created by Avesta Group and powered by Microsoft Azure